Flytur til Indlands og gerist stjórnmálamaður

Á tónleikunum mun ég spila nýtt efni í bland við Leoncie-­smelli. Þetta verður bara gaman, ekkert annað en stuð enda er ég í miklu stuði,“ segir tónlistarkonan Leoncie en hún ætlar að flytja bráðum til Indlands til að sinna stjórnmálum. Þetta verða því væntanlega lokatónleikar hennar hér á landi – í einhvern tíma allavega.

„Mér hefur verið boðið að vera með í pólitík á Indlandi. Mér er alvara með því og það er gott skref. Ég get ekki sagt hvað flokkurinn heitir en þetta er flokkur sem ætlar að klífa metorðastigana í pólitík á Indlandi.“ Aðspurð hvort hún stefni að því að verða hin indverska Katrín Jakobsdóttir svarar Leoncie hlæjandi: „Nei, ég ætla að vera frekar eins og Gandí. Flokkurinn vill að ég standi mig fyrir sig og safni eins mörgum atkvæðum og ég get þannig að ég sagði bara já takk þegar mér var boðið þetta.“

Eiginmaður hennar, Viktor, ætlar að fylgja sinni spúsu til ættlands hennar. Þar ætla þau að koma sér upp fallegu húsi og hafa krókódíla sem gæludýr. „Þetta er mjög spennandi verkefni og ég er mjög spennt og hlakka mikið til. Ég ætla að vera með krókódíla sem gæludýr á Indlandi. Krókódílar eru uppáhaldsgæludýrin mín og ég ætla að skíra þá einhverjum flottum nöfnum.“

Hún segir að húsið sitt sé komið í söluferli en það taki tíma að selja og finna almennilegt hús á Indlandi. „Ég er búin að ganga frá því að fá krókódílana. Þeir bíða bara eftir mér. Svona hlutir taka tíma. Það gæti líka vel verið að ég hætti við að selja og leigi húsið frekar. Þá er ég að spá í að leigja það samkynhneigðu fólki. Sumir geta ekki fengið hús til leigu og þetta gæti verið góð lausn. Gatan þarfnast líka meiri gleði og í mínu húsi er alltaf gleði og glaumur þannig að hér má halda fjölmörg partí,“ segir hún og hlær.

Nýja platan hennar, Mr. Lusty, var tekin upp á stuttum tíma. „Upptökustjórinn Kristján var frábær. Hann hafði aldrei kynnst öðrum eins hraða og í mér. Hann var atvinnumaður fram í fingurgóma. Ég spurði hann hvort hann gæti unnið á Leoncie-hraða og hann gat það. Það fæddust margir töfrar og ég hef aldrei upplifað svona töfra í íslensku stúdíói.“