Stjórnvöld veittu 100 milljón krónum í styrki til jafnréttismála

Á fimmta tug verkefna og rannsókna, sem eiga að efla jafnrétti kynjanna, fengu í gær samtals eitthundrað milljónir króna í styrk frá stjórnvöldum. Fjallað var um málið í kvöldfréttum Stöðvar 2 í gær.

Eygló Harðardóttir, félagsmálaráðherra afhenti styrkina við hátíðlega athöfn í Iðnó í gær á kvennréttindadaginn að viðstöddu fjölmenni. 115 sóttu um styrk úr sjóðnum en 42 fengu úthlutun.

Að sögn Eyglóar hafi verið gríðarlegur áhugi fyrir styrkúthlutun. „Það var sótt um fyrir allt að 500 milljónir en í þessu tilviki höfum við einungis um 100 milljónir til úthlutunar.”

Hæsta styrkinn eða 10 milljónir hlaut Pétur Skúlason Waldorf vegna verkefnisins „Go for No“

„Við ætlum að kanna stöðu kvenna í jarðhitageiranum. Þessi úthlutun mun skipta sköpum þegar kemur að verkefninu sérstaklega íslenska hlutanum og við erum að vinna í honum í jarðhitageiranum í alþjóðlegu samstarfi. Þannig að við erum mjög þakklátar og þetta er mikill heiður fyrir og verkefnið og okkur allar.” segir Gréta Ólafsdóttir sem tók á móti styrknum fyrir hönd „Go for NO”.

Starfsgreinasambandinu var einnig úthlutað tveggja milljónakróna styrk vegna verkefnisins „Gegn mansali – Samvinna yfir landamæri“

Drífa Snædal segir að hugmyndin með verkefninu sé að búa til tengiliði á hinum norðurlöndunum til að vinna saman. Miðla reynslu og fá þekkingu hingað og auðvitað til að búa til tengslanet til að geta virkjað það þegar á þarf að halda.

„Þetta kemur okkur vel á veg. Við erum í samstarfið við lögregluna og velferðarsvið Reykjavíkurborgar og fleiri, og mér sýnist á þessum styrkju sem veittir voru í dag að þetta muni skipta miklum sköpum fyrir okkur og víðar í samfélaginu.” Segir Drífa að lokum.

Sjóðurinn, sem var stofnaður í fyrra, nýtur framlaga af fjárlögum næstu fimm árin.

„Markmiðið okkar með jafnréttissjóðnum er að vinna áfram að jafnrétti í íslensku samfélagi því það er ekkert land í heiminum sem er búið að ná full jafnrétti þá að við teljum okkur vera komin vel áleiðis. En hinsvegar er alveg ljóst að hérna eru mjög breytt og mörg mikilvæg verkefni sem ætlun er að styrkja og muni bæta íslenskt samfélag.” segir Eygló Harðardóttir, félagsmálaráðherra.