„Stjórnmálamenn gera ekki neitt“

Það er enginn dugnaður í stjórnmálamönnum í dag og þeir gera ekki neitt, segir ellilífeyrisþegi sem ætlað er að framfleyta sér á ríflega fimmtíu þúsund krónum á mánuði. Hún hvetur eldri borgara til að sameinast á láta í sér heyra, annars verði kjör þeirra aldrei bætt.

Guðrún Einarsdóttir dvelur þessa dagana á Vífilstaðaspítala þar sem hún fær þá umönnun sem hún þarfnast. Hún bíður eftir varanlegu plássi á hjúkrunarheimili en þarf á sama tíma að reka sitt eigið heimili í vesturbænum. Til þess fær hún í dagpeninga, 53 þúsund krónur á mánuði.

„Það er ekki nokkur leið að lifa af 53 þúsund krónum á mánuði, það er ekki hægt,“ segir Guðrún.

Guðrún er 82 ára og hefur undanfarna fimm mánuði beðið eftir plássi á hjúkrunarheimili. Vegna veikinda var hún vistuð á Vífilstaðaspítala og samkvæmt núgildandi reglum falla lífeyrisgreiðslur hennar niður í kjölfarið. Í staðinn fær hún vasapening upp á 53.354 krónur á mánuði.

„Nú þarf að virkja alla eldri borgara. Þeir verða núna að standa upp og láta í sér heyra.“

Annars gerist ekki neitt að mati Guðrúnar. Það hafi sýnt sig engin leið sé að treysta á stjórnmálamenn.

„Þeir gera ekki neitt. Það er enginn dugnaður í þeim og það hefur ekki heyrst í velferðarráðuneytinu síðan nýja stjórnin tók við. Svo það er kominn tími til að þeir láti heyra í sér og geri eitthvað,“ segir Guðrún ákveðin.

Guðrún vildi þó að fram kæmi að vel væri hugsað um fólkið á Vífilsstöðum.

„Það er alveg sérstaklega gott fólkið hérna í alla staði, vakandi yfir okkur og það gerir okkur svo lífið miklu léttara hérna.“

Eygló Harðardóttir félagsmálaráðherra gaf ekki kost á viðtali vegna málsins í dag.