Grýtti hvolp og sparkaði í hann að ástæðulausu

„Það er eitthvað mikið að honum, hann svarar engu kalli eða neitt. Þetta er hress hundur vanalega en liggur nú bara hreyfingarlaus,“ segir Anna Björg Kristinsdóttir sem lenti í því um hádegisbilið í dag að maður sem hún segist telja á fertugsaldri kastaði í hund hennar grjóti og sparkaði í dýrið. Hundurinn er rúmlega eins árs gamall labrador sem gengur undir nafninu Monsi.

Maðurinn froðufelldi

„Ég fór út með hundinn og var búinn að vera úti með hann í rúmlega klukkutíma. Hann er rétt yfir eins árs gamall, bara hvolpur ennþá og við erum að leika,“ rifjar Anna upp. Hún var á Álftanesinu á svæði þar sem hún segist vön að leyfa hundinum að leika án þess að vera í taumi og að það sé alvanalegt að hann hitti þar aðra hunda.

„Svo kemur þetta fólk gangandi að, maður og kona með border collie í bandi og hann, Monsi, hljóp að þessu fólki. Og maðurinn bara froðufelldi. Um leið og hann hljóp að hinum hundinum þá sparkar maðurinn í hann,“ útskýrir Anna sem skiljanlega segir sér hafa brugðið töluvert.

Grýtti hvolpinn

„Ég bara fraus. Það var svo mikil heift í manninum.“ Maðurinn lét ekki nægja að sparka í hvolpinn heldur æpti hann: „Ég ætla að rota þetta helvítis kvikindi.“ Anna Björg reyndi að malda í móinn og bað manninn að slaka á en „þá tók hann stein og grýtti í hann. Hundurinn minn fór þá að gelta, hann er náttúrulega að verja sig, þá tekur maðurinn annan stein og grýtti í hann. Hann var bara í svona metersfjarlægð og grjótið lenti á auganu á honum.“

Monsi liggur í jörðinni og vælir og Anna færir hann inn í bílinn sinn. „Ég rankaði ekki við mér fyrr en ég er að koma hundinum fyrir inn í bílnum og sé hvernig það blæðir úr auganu á honum. Þá fatta ég að reyna að ná mynd af fólkinu og hleyp á eftir þeim en þau afþakka að vera á mynd.“ Anna segist hafa keyrt um svæðið eftir að fólkið hvarf til þess að reyna að hafa upp á því en hafi ekki borið árangur sem erfiði.

Stórslasaður hundur

Monsi er mikið slasaður eftir atvikið og ólíkur sjálfum sér. Þegar Vísir náði tali af Önnu var hún á leið með hann á dýraspítala. „Ég hringdi í dag en þá var mér sagt að sjá til þangað til á morgun, athuga hvort að bólgan myndi minnka. En ég er að fara með hann upp á spítala núna, hann var að líða út af. Augun renna til í honum, hann hreyfir sig ekki heldur liggur bara og vælir litla greyið.“

Anna Björg fordæmir hegðun parsins, hún segist ekki skilja viðbrögð þeirra og að hennar mati ættu hundaeigendur að þekkja muninn á árásargjörnum hundi og þeim sem nálgast annan til að leika. Hún viðurkennir að hundurinn hafi ekki verið í ól en bendir á að á svæðinu sem um ræðir sé það alvanalegt þar sem það er afgirt. „Ég hef aldrei hitt fólk með hund í ól þarna áður. Ég benti þeim á að ef að þau vilja ekki að hundurinn þeirra hitti aðra hunda að þá verði þau bara að hafa hann í afgirtum garði heima hjá sér.“

Sögunni deildi Anna inni á síðunni Hundasamfélagið á Facebook og viðbrögðin hafa ekki látið á sér standa. Notendur hópsins segjast sjaldan hafa heyrt jafn hranalega framkomu í garð dýrs og benda á að sjúkrakostnaður í kjölfar atviksins geti numið talsverðum fjárhæðum. Fjölmargir benda Önnu á að kæra hreinlega þessa hegðun til lögreglu.

Anna lýsir parinu sem réðst á hundinn þannig á Hundasamfélaginu að maðurinn sé hávaxinn með dökkt skegg og speglagleraugu en konan er lítil og þétt með gleraugu í ljósblárri úlpu.