Landsbankinn segir fimm manna fjölskyldu að rýma heimili sitt á tíu dögum

Fjölskylda í Hafnarfirði sem leigði einbýlishús í Vallarhverfinu fékk tíu daga frest til að hafa sig á brott eftir að Landsbankinn eignaðist húsið. Leigjandinn undrast framkomu bankans og segir þetta hugsanlega löglegt en með öllu siðlaust.

Jón Þór Þórisson og fjölskylda hans gerðu leigusamning til fimm ára, við eiganda einbýlishúss við Fjóluvelli 3. Það var fyrir rúmu ári. Fyrir nokkru síðan kom á daginn að eigandinn átti í greiðsluerfiðleikum og leigjendurnir leituðu til lögfræðings sem sagði þeim að þar sem leigusamningi hefði verið þinglýst þyrftu þau engar áhyggjur að hafa.

Annað kom hinsvegar á daginn. Þinglýstir leigusamningar falla úr gildi ef hús eru seld nauðungarsölu.

Harkalegt bréf barst frá Landsbankanum fyrsta júní. Þar kom fram að bankinn hefði eignast húsið. Þeim væri gert að flytja út ellefta sama mánaðar eða vera borin út ella á eigin kostnað.

Þegar gengið var á bankann, bauðst starfsmaður hans til að veita fjölskyldunni tveggja mánaða frest til að flytja, ef hún greiddi sextíu þúsund krónum hærri mánaðarleigu. Annars gæti hún fengið fjögurra vikna frest.

Jón Þór er óvinnufær eftir slys um borð í rannsóknarskipinu Árna Friðrikssyni. Hann greiddi hundrað og sextíu þúsund króna leigu gegn því að sinna viðhaldi hússins sem hafði verið fremur ábótavant. Hann og fyrrverandi kona hans höfðu því málað og lakkað, bæði innanhúss og utan, og gróðursett tré í garðinum.

Hjónabandið var í upplausn þegar bréfið barst frá bankanum. Jónþór segir að framkoma bankans hafi þar ekki bætt úr skák. Konan er núna flutt út með börnin en hann segir ekki hlaupið að því að fá íbúð og býður þess sem verða vill. Hann segist alltaf hafa staðið í skilum og staðið við allt sitt. Hann hefði sætt sig við ef bankinn hefði boðið honum fjögurra mánaða frest á sömu kjörum og samningurinn segir til um.