Vigdís segir Alþingi glata virðingu sinni vegna skrílsláta: Kennir strigaskóavæðingu um

Vigdís Hauksdóttir, þingmaður Framsóknarflokksins, segir þingið vera að missa virðingu sína vegna skrílsláta sem þar ríkja. Þetta sagði hún í síðdegisútvarpi Útvarps Sögu þar sem samfélagsumræðan var til umræðu. Sagði hún að því miður væri búið að strigaskóvæða þingið og sú væðing eiga sér upphæð í afnámi bindisskyldunnar.

Í þættinum var fjallað um grein Birgis Guðmundssonar, dósents í fjölmiðlafræði við Háskólann á Akureyri, en í henni komst að þeirri niðurstöðu að samfélagsumræðan sé hinn nýi skuggastjórnandi hefðbundinna fjölmiðla á Íslandi. Skoðanaleiðtogar hafa mikil völd á netinu að því er fram kemur í grein Birgis og sagðist Vigdís taka undir þessa niðurstöðu hans.

Vitnaði Vigdís meðal annars í skrif Ingibjargar Sólrúnar Gísladóttur, fyrrverandi utanríkisráðherra, sem sagði fyrir tveimur árum að íslenskt samfélag væri eineltissamfélag. Sagði Ingibjörg Sólrún stjórnmálamenn, fjölmiðlamenn, bloggara og marga fleiri taka af fullum krafti þátt í eineltinu og nefndi til að mynda að Jón Bjarnason, fyrrverandi ráðherra, og Vigdís Hauksdóttir yrðu iðulega fyrir þessum árásum.

Vigdís sagðist vita til þess að forseti Alþingis hefði tekið upp fyrir forsætisnefnd ástandið á Alþingi hvernig andrúmsloftið var orðið þar innanhúss. Segir hún eineltistilburði og viðbjóð hafa viðgengist þar og hafi ástandið verið orðið ansi svæsið í vor. Hún segist hafa gagnrýnt þessa orðanotkun og árásir á ákveðna aðila á þingi.

„Þetta verður að breytast  þingið er algjörlega að missa virðingu sína með þessum skrílslátum. Ég er hrædd um að við séum að tapa þinginu ef að verður ekki tekið á þessu,“ sagði Vigdís og nefndi tilslökun í umgengni á þingi hafa ýmislegt um það að segja.

„Ég hef oft sagt það að það er eiginlega búið að strigaskóvæða Alþingi. Og ekki gerðar athugasemdir við það að þingmenn taki til máls í ræðustól Alþingis í strigaskóm. Mér finnst það ef þú berð ekki virðingu fyrir starfinu þínu og ert snyrtilega til fara þá er þetta fljótt að fjara undan þessu. Þetta byrjaði þarna þegar bindiskyldan var afnumin á síðasta kjörtímabili þá áttu karlmenn að vera svo frjálslegir að þurfa ekki að vera með bindi í ræðustól. Mér fannst það vera afturför.“