Hatursfull umræða og svartur húmor

Gestur spjallborðs sem Fréttablaðið hefur fjallað um í vikunni segir engan hatursáróður þar að finna heldur í versta falli hatursfulla umræðu. Á spjallborðinu er að finna ummæli Íslendinga sem níðast á flestum hugsanlegum minnihlutahópum.

Spjallborðsgesturinn segir ummælin sögð í hálfkæringi í þessum menningarkima internetsins. Hann segir fólk blása upp skoðanir sínar til þess að hneyksla og vekja hlátur.

Gesturinn segir að spjallborðsgestir taki dæmi, til dæmis um að blökkumenn séu með meiri glæpahneigð en hvítt fólk, sem hann segir satt samkvæmt opinberum bandarískum tölum, og ýki það upp án þess að vera á móti blökkumönnum.

Sjá einnig: Íslendingar deila hatursáróðri á spjallborði

Hann segir ýkjurnar svo settar fram á öfgafullan hátt með orðalagi sem þætti ekki í lagi annars staðar á netinu. Gesturinn segir þetta án efa smekklaust en hluta af menningu spjallborðsins.



Guðrún Pétursdóttir félagsfræðingur er ekki sammála fullyrðingu spjallborðsgestsins um glæpahneigð blökkumanna og kallar hana steypu. 

„Þetta er margútskýrt. Þegar yfirvöld beina sjónum sínum að ákveðnum hóp svona mikið endurspegla tölurnar það. Ef þú stoppar bara svarta menn sem keyra of hratt sýnir tölfræðin að svartir keyra hraðar en hvítir,“ segir Guðrún.

Sjá einnig: Skaðlegt að loka á hatursáróðurssíðu

„Meirihlutinn hefur byggt upp kerfi sem reynir að viðhalda stöðunni. Ég held að glæpatíðni sé ekki hærri hjá svörtu fólki heldur handtökurnar,“ segir Guðrún og bætir við að kerfið bæli minnihlutahópa niður og haldi þeim í áframhaldandi þrælahaldi, meðal annars með því að taka af þeim félagsleg réttindi eins og kosningarétt, sem maður missir við afbrot.

Gesturinn segir spjallborðið vettvang til að ræða hin og þessi mál án þess að þaggað sé niður í fólki og segir innihaldið svartan húmor og kaldhæðni með hugmyndafræðilegum undirtónum.

Eigandi spjallborðsins sem Íslendingarnir sækja, Fredrick Brennan, segir hatursáróður og kynþáttafordóma ekki brjóta gegn reglum síðu sinnar.

Á síðunni getur hver sem er stofnað spjallborð um nærri hvað sem er á hvaða tungumáli sem er. Aðspurður hvort eitthvað sé bannað segir Brennan svo vera. „Barnaklám og sumt höfundarréttarvarið efni er tekið niður af síðunni.“ Hann segist þó ekki geta fylgst með allri umræðu á síðu sinni og hvort hún sé lögleg í landi þeirra sem á síðuna skrifa. „Ég hef ekki tíma til að fylgjast með kjánalegum lögum heimsins. Vissir þú að það er ólöglegt að vera feitur í Japan?“ spyr Brennan, þegar hann er spurður hvort hann viti að hatursáróður sé ólöglegur á Íslandi.