Vandi Sunnuhlíðar leystur í vikunni

Stefnt er að því að ljúka samningum sem leysa eiga skuldavanda hjúkrunarheimilisins Sunnuhlíðar í vikunni. „Það eru að klárast ákveðnir samningar við marga aðila til að koma dæminu í höfn,“ segir Þóra Þórarinsdóttir, formaður stjórnar sjálfseignastofnunarinnar Sunnuhlíðar.

Vigdísarholt, félag í eigu ríkisins, tók yfir rekstur hjúkrunarheimilisins á síðasta ári vegna mikils skuldavanda Sunnuhlíðar. Sunnuhlíð hefur hins vegar áfram átt húsnæði hjúkrunarheimilisins sem og átt og séð um rekstur íbúða í nágrenni við heimilið.

Samkomulagið fellst í því að ríkið mun eignast húsnæði hjúkrunarheimilisins við Kópavogsbraut 1c gegn því að taka yfir hluta skulda samtakanna, sem námu hátt í hálfum milljarði samkvæmt ársreikningi ársins 2013. Sunnuhlíð mun hins vegar áfram eiga og reka íbúðirnar.

Þá mun Kópavogsbær einnig gefa eftir áfallin fasteignagjöld á árunum 2009 til 2013 og fyrstu þrjá mánuði ársins 2015, sem nema 59 milljónum króna en með áföllnum vöxtum samtals 81 milljón króna. Tillaga þess efnis var samþykkt af öllum ellefu bæjarfulltrúum í bæjarstjórn Kópavogs þann 9. júní síðastliðinn með þeim fyrirvara að kaup ríkisins á húsnæði Sunnuhlíðar gengu eftir.

Á móti hyggst Kópavogsbær draga saman útgjöld til framkvæmda á þessu ári sem nemur niðurfellingu fasteignagjalda svo aðgerðin á ekki að hafa áhrif á afkomu bæjarsjóðs.

„Það myndaðist strax þverpólitísk sátt um að Kópavogsbær myndi komast að lausn málsins með styrk sem nemur skuldinni,“ segir Ármann Kr. Ólafsson, bæjarstjóri Kópavogs. Ármann segir að brýnt hafi verið að tryggja rekstur hjúkrunarheimilisins í bæjarfélaginu enda ætti það sér merka sögu.