Skráning kirkjubóka eitt verkefna til að styrkja byggð

Gert er ráð fyrir að átta stofnanir og verkefni verði flutt til Norðvesturlands samkvæmt tillögum nefndar á vegum forsætisráðherra. Einnig er gert ráð fyrir fjölda nýrra verkefna til að styrkja og efla byggð í landshlutanum. Lagt er til að í það minnsta 130 störf verði til í landshlutanum eða flytjist þangað á næstu misserum.

Um aldamótin 2000 bjuggu 7.970 íbúar í landshlutanum. Þann 1. janúar síðastliðinn voru íbúarnir 7.137. Mest er fækkunin það sem af er öldinni á Skagaströnd eða rúmlega 20 prósenta fækkun. Í Skagafirði hefur fækkað um 6,6 prósent frá aldamótum.

Lagt er til að RARIK verði flutt til Skagafjarðar, Minjastofnun á Sauðárkróki efld, að eigendahlutverk ríkisins í stofnfé Sparisjóða verði fært til Byggðastofnunar, Siglingasvið Vegagerðarinnar verði flutt til Skagafjarðar og að umferðareftirlit Samgöngustofu fari til lögreglunnar í landshlutanum. Einnig á ný þýðingarmiðstöð utanríkisráðuneytisins að verða til í landshlutanum og sex störf að flytjast innan Vinnumálastofnunar í landshlutann vegna aukinna verkefna greiðslustofu stofnunarinnar.

Langflest störfin sem munu flytjast frá öðrum landshlutum til landshlutans koma frá RARIK, eða um 50 talsins. Einnig er ráðgert í tillögum nefndarinnar að 18 störf siglingasviðs Vegagerðarinnar flytjist til Skagafjarðar og að fjögur störf Samgöngustofu verði lögð niður og færð til lögreglunnar í umdæminu.

Nú hafa tillögur nefndarinnar verið til meðferðar hjá forsætisráðuneyti síðan um miðjan desember. Hvorki Þórólfur Árnason, forstöðumaður Samgöngustofu, né Hreinn Haraldsson, forstjóri Vegagerðarinnar, höfðu heyrt af hugmyndum nefndarinnar og þær höfðu ekki verið ræddar við þá.

Þrettán verkefni eru einnig þess eðlis að um ný störf er að ræða sem kostuð eru af ríkinu. Þar kennir margra grasa. Til að mynda er tillaga um að þrjú ný störf verði til í þriggja ára verkefni um skráningu kirkjubóka í landshlutanum. Heildarkostnaður við það verkefni verði um 45 milljónir króna, eða 15 milljónir króna árlega.

Nefndin leggur einnig til að 30 milljónum verði varið í frumkvöðlasetur í tengslum við einkahlutafélagið BioPol ehf. á Skagaströnd. Einkahlutafélagið er í eigu sveitarfélagsins Skagastrandar. Nefndin leggur til að hið opinbera leggi fé í tækjabúnað að upphæð 13 milljónir króna, breytingar á húsnæði einkahlutafélagsins sem metið er á 7 milljónir króna og að eitt stöðugildi verði til í Háskólanum á Akureyri að upphæð 10 milljónnir króna sem yrði þá staðsett á Skagaströnd.

Í lok síðasta árs tók Byggðastofnun saman fjölda opinberra starfa eftir landshlutum. Í þeirri greiningu kemur fram að í landsbyggðunum sker Norðvesturland sig úr í fjölda opinberra starfa. Norðvesturland býr hlutfallslega yfir flestum opinberum störfum, ef horft er til fjölda íbúa.