Vitneskja um „hættulega einstaklinga“ hér á landi

Lögregla á Íslandi býr yfir upplýsingum um einstaklinga sem búa yfir „bæði löngun og getu til að fremja voðaverk.“ Telja verður þessa einstaklinga hættulega samfélaginu. Á Íslandi er til staðar geta til að framkvæma hryðjuverk og aðrar stórfelldar árásir með vopnum sem eru aðgengileg almenningi.

Þetta segir í nýju hættumati greiningardeildar ríkislögreglustjóra á hryðjuverkum og öðrum stórfelldum árásum. Í hættumatinu kemur fram að hættustig, eða vástig, vegna hryðjuverkaógnar á Íslandi hefur verið hækkuð og er nú „í meðallagi.“ Jafnframt er í matinu lagt til að rannsóknarheimildir lögreglu vegna rannsóknar hryðjuverkabrota verði auknar.

Í matinu segir að í landinu séu vopn, aðgengileg almenningi, sem nýta megi til að framkvæma hryðjuverk og aðrar stórfelldar árásir. Líkt og greint hefur verið frá, eru rúmlega sjötíu þúsund skotvopn löglega skráð á Íslandi en fjöldi óskráðra vopna óþekktur. Talið er að nokkrir tugir þúsunda vopna geti verið óskráð.