Lögheimilisskráning klýfur Rangárþing

Sveitarstjóri Rangárþings ytra er með lögheimili í sveitarfélaginu þrátt fyrir að föst búseta hans sé í nágrannasveitarfélaginu Rangárþingi eystra. Rangárþing ytra greiðir þar af leiðandi fyrir skólagöngu barns hans á Hvolsvelli vegna lögheimilisskráningar fjölskyldunnar.

„Það er ekkert athugavert við það að við greiðum fyrir skólagöngu barns sveitarstjórans í öðru sveitarfélagi,“ segir Þorgils Torfi Jónsson, oddviti D-listans í meirihluta Rangárþings ytra.

Ágúst Sigurðsson, sveitarstjóri Rangárþings ytra, er með fasta búsetu á Öldubakka á Hvolsvelli í Rangárþingi eystra. Ágúst og fjölskylda hans eru hins vegar með lögheimili skráð í Kirkjubæ í Rangárþingi ytra.

„Þetta hefur tíðkast á þessa leið í mörg ár að nokkur börn sem lögheimili hafa hjá okkur fari í grunnskóla á Hvolsvelli,“ segir Þorgils Torfi Jónsson.

Þorgils Torfi segir að í sumum tilvikum sé hagræði að því að börnin séu í námi á Hvolsvelli frekar en á Hellu vegna nálægðar við Grunnskólann á Hvolsvelli. Litlu máli skipti hvort um sé að ræða börn sveitarstjóra eða önnur börn, greitt sé fyrir skólagöngu allra barna.

Yngvi Karl Jónsson, oddviti minnihluta sveitarstjórnar Rangárþings ytra, segir lögheimilisskráningu sveitarstjórans hafa verið milli tannanna á íbúum sveitarfélagsins í kringum síðustu kosningar. Að hans mati sé þekkt staðreynd að sveitarstjórinn sé búsettur á Hvolsvelli þrátt fyrir að hafa lögheimili í sveitarfélaginu.

„Sjálfsagt er þetta einkennileg staða. Bent hefur verið á þetta en engin leið fyrir okkur að hnekkja þessari búsetu. Við teljum okkur vera búin að vekja athygli á þessu en það hefur ekkert verið leiðrétt eða gert í málinu,“ segir Yngvi Karl.

Í fyrstu grein laga um lögheimili segir að lögheimili sé sá staður þar sem maður hafi fasta búsetu, dveljist í að jafnaði í tómstundum sínum, hafi heimilismuni sína og sé svefnstaður.

Því segir Yngvi Karl rökrétt að lögheimilisskráning sveitarstjóra sé röng samkvæmt laganna bókstaf. Það skjóti skökku við að röng skráning leiði til þess að bærinn þurfi að greiða fyrir skólagöngu barna sveitarstjórans.

„Auðvitað er þetta einkennileg staða en á móti kemur að sveitarstjórinn greiðir þá útsvar í okkar sveitarfélagi,“ segir Yngvi Karl.

Ísólfur Gylfi Pálmason, sveitarstjóri Rangárþings eystra, segir eðlilegt að ef fjölskyldur séu með lögheimili á einum stað en búi á öðrum að útsvarstekjur þeirra skiptist til helminga á milli sveitarfélaganna.

Ekki náðist í Ágúst Sigurðsson við vinnslu fréttarinnar.