Um fjórðungur ekki með börn sín til tannlæknis

Um fjórðungur barna á Íslandi fer ekki í reglubundnar tannlæknaskoðanir. Því er hafin vinna við að útbúa kerfi, svokallað heimilistannlæknakerfi, svo hægt sé að fylgjast með þeim börnum sem ekki leita til tannlæknis.

Nú um áramótin tók í gildi samningur um gjaldfrjálsar tannlækningar barna og nær hann til þriggja ára barna og barna á aldrinum átta til sautján ára. Þá tekur hann til allra barna í bráðvanda, að uppfylltum ákveðnum skilyrðum, óháð áfangaskiptingu samningsins. Samningurinn hefur komið í fjórum  skrefum frá maí 2013 en frá og með janúar 2018 munu öll börn yngri en átján ára njóta ókeypis tannlækninga.

„Fólk heldur að þetta sé svo dýrt og fer ekki með börnin til tannlæknis. Það þarf kannski bara að kynna þetta betur,“ sagði Kristín Heimisdóttir, formaður Tannlækningafélags Íslands, í samtali við Bítið á Bylgjunni í morgun.

Heimilistannlæknir er forsenda þess að börn njóti gjaldfrjálsra tannlækninga. Um 75 prósent barna eru með skráðan heimilistannlækni en erfitt er að fylgjast með þeim 25 prósentum sem eftir standa, að sögn Kristínar.

„Við erum að vinna að því í samvinnu við yfirvöld að búa til kerfi þar sem við finnum þessi börn sem ekki er farið með og finna leiðir til þess að fara með þau,“ segir Kristín.

„Það er lítill hópur sem er illa staddur og dregur meðaltalið svolítið til hjá okkur þannig að við erum ekki að standa okkur vel miðað við nágrannalöndin. Við erum með stóran hóp sem stendur sig mjög vel þannig að það er langmikilvægast að ná í þau börn sem ég hef grun um að skili sér síst. Börn velja sér ekki foreldra,“ segir hún. Mikilvægt sé að samfélagið grípi inn í og hlaupi undir bagga, því öll börn eigi rétt á að njóta tannlæknaþjónustu. Börn séu í mismikilli áhættu og það sé tannlæknis að ákveða hversu oft barnið kemur í skoðun.

Foreldrar geta nýtt sér gjaldfrjálsar tannlækningar með því að fylla út eyðublað á vefsvæði Sjúkratrygginga Íslands, sjukra.is. Séu þeir í vandræðum með að fylla það út geta þeir gert það í samráði við sinn tannlækni.

Hægt er að hlusta á viðtalið við Kristínu í heild sinni í spilaranum hér fyrir ofan.