„Sannarlega eitthvað misfarist“

„Það hefur svo sannarlega eitthvað misfarist. Við förum yfir 1.500 ferðir á dag og langflestar ferðir eru farnar á réttan stað á réttum tíma. Það hafa orðið einhver frávik, einhverjir tugir á dag. En við erum að ræða málin og teljum að hlutirnir muni fara batnandi,“ segir Ástríður Þórðardóttir, framkvæmdastjóri Strætó.

Fyrsti fundur samráðshóps um ferðaþjónustu fatlaðra fór fram í höfuðstöðvum Strætó við Hestháls í Árbæ í gær. Fundurinn var meðal annars haldinn vegna óánægju sem ríkt hefur síðan Strætó tók við rekstrinum og þeirra fjölmörgu kvartana sem borist hafa að undanförnu.

Unnið að úrbótum

Ástríður segir að á fundinum hafi verið farið yfir þessar kvartanir. Þá hafi fulltrúar hagsmunasamtaka lagt fram sínar ábendingar og að þær verði teknar til skoðunar hjá Strætó.

„Fólk kannski upplifir að eitthvað hafi misfarist. Upplifir jafnvel þjónustuskerðingu vegna þess að það vær ekki lengur sama bílstjóra eða sama aðila þegar það hringir inn. Kvartanirnar snúa oft að því, en þessir hlutir eru ekki inni í þjónustulýsingunni,“ segir hún.

Óánægjan ríkir meðal annars vegna þess að dæmi eru um að fatlaðir séu látnir rúnta um bæinn tímunum saman og að dagskrá margra hafi farið úr skorðum. Þá hafi bílstjórar gleymt að festa fólk í bílbelti og í kjölfarið hafi það oltið úr hjólastólum sínum.

Bílstjórar sæki námskeið

„Það er margítrekað búið að fara yfir öryggismálin og allir bílstjórar búnir að fá góða þjálfun í því,“ segir hún og bætir við að á næstu dögum verði haldin námskeið sem allir bílstjórar munu sækja. „Þetta eru námskeið varðandi mismunandi fatlanir og hvernig eigi að bregðast við því, skyndihjálp er til dæmis liður í því.“

Fundir samráðshóps Strætó hafa verið haldnir fjórum sinnum á ári hingað til, en eftir að Strætó tók við rekstri ferðaþjónustu fatlaðra verða þeir haldnir tíðar en áður. Næsti fundur er boðaður eftir tvær vikur.