Slasaður ferðalangur á Vestfjörðum: „Hefði getað haldið áfram á feti“

„Ég hef það bæði skítt og gott svona miðað við allt. Ég er nokkuð ókvalinn og get haltrað um svona innan skekkjumarka,“ segir Þórður Halldórsson. Þórður slasaðist í gær í reiðtúr skammt frá Skipeyri í Hrafnfirði á Hornströndum. 

Þórður var á ferð í tíu manna hópi en reiðtúrinn sem hann var í tekur alls níu daga séu komu og brottfarardagur tekinn með í dæmið. Riðið er í kringum Drangjökul, gist í tjöldum og gengið á fjöll sem verða á vegi ferðalanga.

„Við vorum að ríða þarna inn og það varð tófa á vegi okkar. Í upphafi virðist hún hafa ætlað að liggja okkur af sér en síðan guggnaði hún á því og spratt upp. Hrossinu brá við það og stökk til hliðar.“

Hefði getað ráðið við fetið

Vikuna fyrir ferðina hafði Þórður tognað í hægri fæti og var því ekki alveg hundrað prósent í ferðinni. „Ég kreppti fótinn ósjálfrátt, það kom högg á vöðvann en ég beit það í mig að halda áfram. Þegar við komum upp á Skorarheiðina þurfti að járna hross og ég var hálfþróttlaus og þurfti að hvíla mig á milli hóffjaðra.“

Þórður er vanur hestaferðunum en í rúma tvo áratugi hefur hann riðið þessa leið með fólki sem vill fara hana. Ferðirnar eru farnar tvisvar til þrisvar sinnum á hverju sumri. Hann segir að með í för hafi verið manneskja sem hafi bent honum á að ekkert vit væri í því að halda áfram. Lærvöðvinn væri nokkuð stór og gæti rúmað heilmikið af blóði.

„Ég hefði ábyggilega getað haldið áfram á rólegu feti en við vorum að komast á stað þar sem hrossin hefðu tekið sprettinn. Við hrossið áttum einfaldlega ekki samleið lengur og því var afráðið að koma mér undir læknishendur.“

Í upphafi stóð til að þyrla Landhelgisgæslunnar myndi sækja Þórð en sökum þoku var hætt við það. Þess í stað kom gönguhópur og sótti hann en þeir komu á staðinn með björgunarskipunum Gísla Hjalta og Helga Páls.

„Við komum á Ísafjörð um þrjúleitið í nótt. Þetta er sennilega slitinn vöðvi aftan á lærinu eða í það minnsta trosnaður. Sem stendur ræð ég við að ganga en á erfitt með óvæntar, snöggar hreyfingar. Fólkinu sem hafði fyrir því að ná í mig og koma mér til byggða vil ég þakka sérstaklega fyrir björgunina,“ segir Þórður að lokum.