Tuttugu björgunarmenn bera slasaðan göngumann niður

Það tekur björgunarmenn tæpan klukkutíma að labba upp að Skorarvatni á norðanverðum Vestfjörðum en þar er slasaður göngumaður í 220 metra hæð.

Jón Arnar Gestsson, formaður svæðisstjórnar Slysavarnafélagsins Landsbjargar á norðanverðum Vestfjörðum, segir að fyrstu menn séu nýkomnir til mannsins en fleiri séu á leiðinni upp eftir.

Björgunarskipin Gísli Hjalta og Helga Páls fóru af stað til Hrafnsfjarðar með björgunarfólk og búnað til að sækja manninn um klukkan átta í kvöld. Jón Arnar segir að alls fari um 20 manns í land til að bera manninn niður. Maðurinn er slasaður á fæti og getur ekki gengið.

„Það tekur svona 2-3 tíma að koma honum niður. Hann er þarna með hópi fólks í hestaferð og er svo þjáður að hann getur ekki setið á hesti.”

Jón segir að búast megi við því að maðurinn komist á Sjúkrahúsið á Ísafirði einhvern tíma eftir miðnætti.