Sláttur hafinn á Suðurlandi

Sláttur hófst á Suðurlandi í dag hjá bændunum á Skíðabakka í Austur-Landeyjum, eða þeim Elvari Eyvindssyni og Rúti Pálssyni.

„Ég sló einhverja þrjá hektara, grasið á þeim var fínt, þetta var vallarfoxgras. Það er eitthvað lengra í næsta slátt, líklega vika, en lítil grasspretta var í vor vegna kulda eins og allir vita,“ segir Rútur.

Hann mun slá um 64 hektara í sumar. „Já, ég reikna með að fleiri bændur byrji um helgina, menn eru alls staðar í startholunum að taka spariblettina,“ bætir Rútur við.