Átta vikur í gæsluvarðhaldi vegna hnífstunguárásar

Gæsluvarðhald hefur verið framlengt yfir karlmanni sem grunaður er um að hafa reynt að ráða Sebastian Andrzej Golab bana þann 23. nóvember síðastliðinn. Sebastian var stunginn í gegnum hjartað en skjót handtök lækna urðu til þess að bjarga honum. Hann var útskrifaður af Landspítalanum rúmri viku eftir árásina.

Kristján Ingi Kristjánsson, yfirlögregluþjónn á höfuðborgarsvæðinu, segir í samtali við Vísi að nýbúið sé að framlengja gæsluvarðhald yfir manninum. Rannsókn málsins standi enn yfir og líður að lokum hennar.

Upphaflega voru þrír menn settir í gæsluvarðhald en tveimur var sleppt um miðjan desember. Sá sem enn er í varðhaldi hefur verið þar í átta vikur. Kristján Ingi segir málið unnið eins hratt og hægt sé. Lögreglan sé meðvituð um dóm í Hæstarétti þar sem talað sé um að menn séu ekki lengur en tólf vikur í gæsluvarðhaldi á grundvelli almannahagsmuna.