Innlent

Framsókn skipar Gústaf sem varamann í mannréttindaráð borgarinnar

Jakob Bjarnar skrifar
Gústaf Níelsson er yfirlýstur andstæðingur mosku í Reykjavík og flokksbundinn Sjálfstæðismaður.
Gústaf Níelsson er yfirlýstur andstæðingur mosku í Reykjavík og flokksbundinn Sjálfstæðismaður. Vísir/GVA
Gústaf Níelsson sagnfræðingur hefur verið skipaður varamaður í Mannréttindaráð Reykjavíkur fyrir hönd Framsóknar og flugvallarvina. Gústaf, sem er flokksbundinn Sjálfstæðismaður, hefur sætt harðri gagnrýni fyrir ummæli sín í garð múslíma en hann hefur lýst því yfir opinberlega að hann sé á móti mosku í Reykjavík.

Guðfinna Jóhanna Guðmundsdóttir, borgarfulltrúi Framsóknar, segir allskonar raddir eigi að hljóma í mannréttindaráði borgarinnar.

Á móti moskunni

Gústaf hefur sætt harðri gagnrýni fyrir ummæli sín í garð múslíma en á síðasta ári lagði hann til að Ísland bannaði hin íslömsku trúarbrögð og setti þannig fordæmi fyrir alla Evrópu. Í viðtali í útvarpsþættinum Harmageddon í maí síðastliðnum sagðist hann telja mikilvægt að standa vörð um kristin gildi  Íslendinga. Þá lýsti hann áhyggjum af því að reist yrði moska í Reykjavík.

Guðfinna Jóhanna Guðmundsdóttir, borgarfulltrúi Framsóknar og flugvallarvina.
„Ísland er síðasta kristna vígið, og það er að falla. Það er bara þannig“ sagði Gústaf í viðtalinu og hélt áfram: „Eru það fordómar að hafa þessa skoðun að það sé ekki heppilegt að fylla landið af múslimum?“



Allskonar raddir í mannréttindaráði


Gústaf, sem er bróðir Brynjars Níelssonar þingmanns, er flokksbundinn sjálfstæðismaður og fyrrverandi framkvæmdastjóri þingflokks Sjálfstæðisflokksins. Það kemur þó ekki að sök, að mati fulltrúa Framsóknarflokksins. 

„Nei alls ekki,“ segir Guðfinna Jóhanna Guðmundsdóttir, borgarfulltrúi Framsóknar, aðspurð hvort það setji strik í reikninginn að hann skuli vera flokksbundinn Sjálfstæðismaður.

„Gústaf hefur verið virkur í þjóðfélagsumræðunni síðustu árin. Á grundvelli yfirlýsinga í samstarfssáttmála meirihlutans um að hlustað sé á allskonar raddir og þeim skapaður vettvangur þá er það mat borgarfulltrúa Framsóknar og flugvallarvina að skipan hans sem varamanns styðji við þau sjónarmið,“ segir Guðfinna um skipun Gústafs í ráðið.

Sverrir Agnarsson, formaður Félags múslíma á Íslandi.
Blöskrar skipun Gústafs

Sverri Agnarssyni, formanni Félags múslíma á Íslandi, blöskrar þessi tilhögun og segir hana hljóta að gefa undir fótinn öllum vangaveltum um tengsl Framsóknarflokksins við popúlískar hreyfingar í Evrópu.

„Þetta er eiginlega eini maðurinn sem ég hef misst mig gagnvart lengi. Ég kallaði hann fordómafullt idíót og get endurtekið það hvenær sem er. Þessi gerningur neglir endalega skiltið rasistar á borgarfulltrúa framsóknar,“ segir hann.

Moskumálið breytti kosningunum

Ummæli Sveinbjargar Birnu Sveinbjörnsdóttur, oddvita Framsóknar í borginni, um að afturkalla ætti lóð undir mosku settu kosningabaráttuna fyrir sveitarstjórnarkosningarnar 2013 á hliðina. Hún var harðlega gagnrýnd fyrir ummælin og sagði fimmti maður á lista flokksins fyrir kosningarnar sig úr Framsóknarflokknum og vék af listanum.

Flokkurinn mældist ekki með nægan stuðning til að ná inn fulltrúa fyrr en að Sveinbjörg tjáði sig um moskuna en þegar talið var upp úr kjörkössunum reyndist flokkurinn hafa náð tveimur mönnum inn í borgarstjórn.


Tengdar fréttir

Sveinbjörg efast um niðurstöður greiningar á hatursorðræðu

Sveinbjörg Birna Sveinbjörnsdóttir, borgarfulltrúi Framsóknar og flugvallarvina telur að draga megi verulega í efa niðurstöður skýrslu um greiningu hatursorðræðu í ummælakerfum íslenskra netfréttamiðla, sem unnin var fyrir mannréttindaskrifstofu Reykjavíkurborgar. Hún segir vinnubrögðin við rannsóknina ómarktæk.

Sveinbjörg Birna um andstæðinga múslima: „Þeir veðjuðu á rangan hest“

Sveinbjörg Birna Sveinbjörnsdóttir var spurð hvort að Framsóknarflokkurinn ætlaði að beita sér fyrir afturköllun lóðarinnar. „Nei, en við ætlum að beita okkur fyrir því að það fari fram lögleg stjórnsýsla í Reykjavík.“ Vísir fer yfir ummæli Sveinbjargar fyrir borgarstjórnarkosningarnar.




Fleiri fréttir

Sjá meira


×