Breyta hringtorgi í Kópavogi eftir að ekið var á barn

„Varðandi þetta tiltekna hringtorg hefur þegar verið brugðist við og verða gerðar þær úrbætur sem við teljum að séu nauðsynlegar í þessu tilfelli,“ segir Eiður Guðmundsson,  forstöðumaður Þjónustumiðstöðvar Kópavogsbæjar, um hringtorg á Fífuhvammsvegi við Salaveg í Kópavogi sem lögreglan á höfuðborgarsvæðinu gagnrýndi á Facebook-síðu sinni fyrir helgi.

Gagnrýnin kom í kjölfar umferðarslyss sem átti sér stað á hringtorginu föstudaginn 3. Júlí þegar ekið var á sjö ára stúlku á reiðhjóli. Gagnrýndi lögreglan uppsetningu gangbrautar við hringtorgið og sagði hönnunina byrgja sýn ökumanna. Um dæmigert slys við hringtorg hefði verið að ræða þar sem ökumaðurinn sá ekki barnið fyrr en það var um seinan.

Sjá einnig: Lögreglan gagnrýnir uppsetningu gangbrautar við hringtorg eftir að ekið var á stúlku

Eiður segir starfsmenn Kópavogsbæjar hafa fjarlægt gróður af hringtorginu til að auka útsýni ökumanna. „Það var strax brugðist við í sjálfu sér. Síðan verður skoðað hvort þurfi að gera eitthvað meira, meðal annars varðandi staðsetningu gangbrautar og annað,“ segir Eiður sem á von á því að önnur hringtorg í bæjarfélaginu verði skoðuð í kjölfarið. „Ég geri alveg ráð fyrir því að menn skoði hvort svona aðstæður eru víðar.“

Víða á landinu eru þó hringtorg sem þar sem myndaður hefur verið hóll á þeim miðjum eða gróðri komið fyrir á þeim sem en Eiður segir slíka hönnun oftast hugsaða út frá fagurfræðilegum sjónarmiðum.

„Ég hef séð allskonar útgáfur á hringtorgum víða um land. Þetta er bæði sjónrænt og gera þau fallegri og vissulega til að hindra að menn keyri beint yfir þau. Síðan eru önnur vandamál varðandi þessi hringtorg. Fólk keyrir sérstaklega á hringtorgum sem eru með einni akrein, í staðinn fyrir að taka hringinn þá reynir það að keyra sem beinast til að ná sem mestum hraða yfir hringtorgið. Það er líka vandamál.“