Stórbrotin dúkkuhús: Bob Marley og Elvis Presley í unglingaherberginu

Hin 75 ára gamla listakona Bergljót Gunnarsdóttir situr ekki auðum höndum því á meðal áhugamála hennar er að smíða dúkkuhús. Hún hefur nú lokið við smíði tveggja glæsilegra dúkkuhúsa. Um er að ræða stærðarinnar dúkkuhús sem eru sjaldséð hér á landi. „Ég bjó til dúkkuhúsin fyrir langaömmubörnin. Ég hef fengið mikið hól og börnin eru mjög ánægð með þau,“ segir Bergljót. Hún hefur alla tíð verið flink í höndunum og til að mynda unnið við mósaík og gler og ýmislegt annað í gegnum árin.

Hún segist hafa byrjað á að kaupa grind en hafi svo breytt öllu sem hægt var að breyta. „Ég byrjaði á að kaupa eitthvað sem kallað er grind. Ég klæddi húsið að utan og breytti líka innréttingunum svolítið. Ég breytti veggjunum og herbergjaskipan, ásamt því að flísaleggja og teppaleggja gólfin,“ útskýrir Bergljót. Hún notaði svokallaða grind þegar hún hóf að smíða eldra húsið en nýrra húsið smíðaði hún alveg frá grunni. Hún hóf smíðina eftir jólin og segir verkið taka nokkrar vikur.

„Ég var í nokkrar vikur að gera þetta, líklega svona fjórar til sex vikur. Stundum fékk ég köst þegar ég var að þessu og byrjaði kannski á kvöldin og gat verið að alveg til morguns,“ segir Bergljót en hún smíðar einnig flest húsgögn og innviði hússins. „Ég byrjaði að smíða mublur í húsið í kjölfarið . Ég hef til dæmis verið að smíða alls kyns hluti inn í húsið eins og arin, snyrtiborð, klósettrúllur, spegla og kremdollur,“ bætir Bergljót við. 

Hún hefur einnig málað málverk á veggina í húsinu sem minna á Kjarval og Þorvald Skúlason og fleiri. Þá eru einnig plaköt á veggjum í húsinu. „Unglingaherbergið í nýja húsinu hefur fengið talsverða athygli, það er veggfóðrað með Bob Marley-plakötum og stóru Elvis Presley-plakati,“ bætir Bergljót við. 

Hvaða hlut hefur verið erfiðast að smíða? „Pílárarnir í ruggustólnum stóðu svolítið út í allar áttir áður en mér tókst að hemja þá.“

Innblásturinn að hönnun húsanna sækir hún bara í sinn eigin huga og sækir ekki hugmyndir á veraldarvefinn eða annað. „Mig hefur alltaf langað í dúkkuhús en ég eignaðist aldrei svoleiðis. Ég hef alltaf haft mikinn áhuga á svona húsum.“

Bæði húsin eru hugsuð fyrir börn fimm ára og eldri og eru nú eigu langaömmubarna Bergljótar, en langar hana ekkert að búa til fleiri hús og selja jafnvel? „Ég held að fólk mundi ekki borga yfir hundrað þúsund krónur fyrir dúkkuhús, og þó,“ segir Bergljót og hlær. „Ég veit ekki alveg hvað dúkkuhús kosta en ég veit að þau eru rándýr sem ég hef séð úti í Englandi til dæmis. Efnið í mín hús kostar svona fjörutíu til fimmtíu þúsund og svo er vinnan,“ segir Bergljót.