Verðið gæti rokið hratt upp

Alger óvissa ríkir um framtíðarþróun heimsmarkaðsverðs á olíu, segir Ketill Sigurjónsson, sérfræðingur um orkumál.

„Hún er alveg svakaleg. Það er algjörlega ómögulegt að segja eða spá um með einhverjum sannfæringarkrafti hvernig olíuverð mun þróast þegar horft er fram í næstu mánuði eða næstu ár,“ segir hann.

Heimsmarkaðsverð á olíu hefur lækkað um 50 prósent á hálfu ári. Það hefur skilað því að neytendur hér á Íslandi greiða 21 prósents lægra verð fyrir bensínlítrann en þeir gerðu í júní. Þá kostaði hann 252 en kostar nú tæpar 198.

Félag viðskiptafræðinga og hagfræðinga heldur í dag fund um þróun olíuverðs og er Ketill einn framsögumanna á fundinum. „Það sem ég mun hins vegar reyna að sýna fram á er að þessi olíuverðslækkun sem er núna getur varla staðist til lengdar. En það er aftur á móti ómögulegt að segja hvort strax í vor verði olíuverðið búið að hækka aftur í 70 til 90 dollara eða hvort það taki nokkur ár,“ segir hann.

Ketill segir að það hafi verið innistæða fyrir þeirri lækkun sem hefur orðið síðasta hálfa árið, þó að lækkunin hafi orðið óvænt. Þegar fyrirliggjandi upplýsingar séu skoðaðar megi sjá að það hefur verið offramboð á olíu í nokkur misseri og það leiði til lækkunar. „Einhverjir voru búnir að spá þessu en það voru miklu færri en fleiri sem spáðu því að lækkunin yrði svona mikil,“ segir hann.

Ketill segist ekki viss um að fyrirtæki muni byggja viðskiptaáætlanir sínar á þessu lækkaða olíuverði. „Olíuverð hefur breyst rosalega á sex mánuðum og það má halda því fram að það þurfi ekki nema sex mánuði í viðbót og þá er það komið í nánast sama og það var fyrir sex mánuðum. Hvort menn fara að taka stórkostlegar ákvarðanir um að breyta viðskiptaáætlunum út af þessu, það er kannski svolítið óvíst,“ segir hann.