Jón hleypir öllu í bál og brand

Fjármálaráðherra mælti í dag fyrir frumvörpum á Alþingi sem fela í sér stærstu skrefin sem stigin hafa verið til afnáms gjaldeyrishafta. Hann gat þó ekki hafið umræðuna fyrr en umræðum lauk um óvænt útspil formanns atvinnuveganefndar í virkjanamálum.

Almenn samstaða er um það á Alþingi að tvö frumvörp fjármálaráðherra um afnám gjaldeyrishafta fái friðsama og vandaða umræðu og hafði dagskrá þingsins í dag að mestu verið helguð fyrstu umræðu um þau.

En í umræðum um störf þingsins þar á undan sakaði Jón Gunnarsson þingmaður Sjálfstæðisflokksins og formaður atvinnuveganefndar  Steingrím J. Sigfússon fyrrverandi formann Vinstri grænna um tvískinnung þegar kæmi að virkjunum í kjördæmi hans í tengslum við framkvæmdir á Bakka annars vegar og umdeildum virkjanakostum í breytingartillögu meirihluta atvinnuveganefndar hins vegar.

Stærsti ásteytingarsteinninn á þessu þingi er deila stjórnar og stjórnarandstöðu um breytingatillögu meirihluta atvinnuveganefndar í virkjanamálum. Formaður nefndarinnar virtist opna á það í umræðum á þinginu í dag að fresta málinu til haustsins en gerði það með þeim hætti að fjaðrirnar á stjórnarandstöðunni ýfðust.

„En þegar kemur að öðrum kjördæmum (en kjördæmi Steingríms) og öðrum málum þá fara menn að flækja sig í einhverjum forsendum og í einhverjum ferlum og þvæla málinu út og suður. Þannig að það ríkur úr hausnum á þeim sjálfum. Þau skilja ekki sjálf hvað þau eru að tala um. Menn geta auðvitað tekið málið til baka og þá þarf að flytja málið aftur í haust. Þá þarf ráðherra til að fylgja ferlinu eftir því sem skorað er hér á menn að fylgja ferlinu og koma fram með breytingatillögur. Um kannski fimm, sex kosti. Þá er búið að uppfylla þetta og þá getum við afgreitt þetta í október,“ sagði Jón.

En hingað til hafa stjórnarflokkarnir ekki tekið annað í mál en tillagan verði afgreidd nú á vorþinginu eins og tveggja vikna þrotlausar umræður um málið sýna.

Þingmenn gerðu margir harðorðar athugasemdir við ræðu Jóns sem var síðastur á mælendaskrá í umræðum um störf þingsins og því þurftu aðrir að svara honum undir liðnum um fundarstjórn forseta.

„Auðvitað kippi ég mér ekki mikið við skítadreifarana frá háttvirtum þingmanni Jóni Gunnarssyni. Ég mun hafa tækifæri síðar til að jafna þá reikninga ef svo ber undir. En mér er meira umhugað um það að svona lagað sé ekki látið líðast hér í störfum þingsins. Að svona lágkúra og svona ódrengskapur; að vega að mönnum sem ekki geta svarað og hafa ekki ræðurétt í sömu umræðu sé látið viðgangast,“ sagði Steingrímur J. Sigfússon.

Birgitta Jónsdóttir kapteinn Pírata sagði Jóni svo kært að vera í sviðsljósinu og hafa valdið á Alþingi að hann hleypti öllu í uppnám.

„Við erum á Alþingi háttvirts þingmanns Jóns Gunnarssonar en ekki á Alþingi Íslendinga. Og það er absúrd forseti hvað þessi maður ræður miklu hér inni,“ sagði Birgitta.

Hvort þessi umræða verður til þess að samkomulag náist um þinglok skal ósagt látið, en ekkert slíkt samkomulag er í augnsýn enn sem komið er.