Sex ára strákur rambaði inn á grófa klámsíðu: „Það er þessi píkusíða“

María Rún Þorsteinsdóttir, grunnskólakennari og Crossfit-þjálfari í Hveragerði, sagði frá því á Facebook-síðu sinni í gær að 6 ára gamall sonur hennar hefði rambað inn á mjög grófa klámsíðu þegar hann var í heimsókn hjá vini sínum og þeir voru að vafra á netinu.

„Sonur minn kemur sem sagt heim þarna einhvern tímann eftir jól og segir okkur frá því að það hafi verið eitthvað skrýtið þarna í tölvunni hjá vini hans. Síðan koma bara mjög grafískar lýsingar á bara mjög „hardcore“ klámi. Hann lýsti því til dæmis fyrir mér að maðurinn vildi setja typpi inn í konuna, svo pissaði hann hvítu yfir konuna og upp í hana,“ segir María.

Aðspurð hvernig hún brást við þessari frásögn sonar síns segir María að fyrst hafi hún eiginlega frosið en svo bara hlustað á drenginn og segir að í smástund hafi henni fundist þetta pínu fyndið.

„Það var smá skondið að hlusta á hann því hann vissi ekkert hverju hann var að lýsa. Hann áttaði sig ekki einu sinni á því að það væri gat þarna á konum og sagði að maðurinn hefði búið til gat við hliðina á rassinum á konunni. Þetta var sem sagt pínu fyndið í smástund en svo áttaði ég mig á því að ég þurfti náttúrulega bara að hringja í foreldra þessa barns sem hann var með í tölvunni.“

Sjá einnig: Fræða börnin áður en þau byrja að skoða klám.

Ekki flókið að slá xxx inn í tölvuna

María segir að þau hafi skiljanlega fengið sama sjokk og hún. Í gær hafi svo önnur mamma komið að máli við hana og spurt hvort hún kannaðist við síðu sem kallast xxx.

„Ég vissi náttúrulega ekki hvað þeir fóru inn á eða hvernig. Ég prófaði því að setja xxx í browserinn og fór þá bara beint inn á þessa klámsíðu. Þó að strákurinn minn sé ekki mikið í tölvu, og aldrei hérna heima, og kann ekki að leita á netinu eða neitt slíkt, þá kann hann alveg að pikka inn xxx. Það er ekki mjög flókið.“

Hún spurði son sinn út í síðuna og hann vissi alveg um hvað mamma sín væri að tala.

„Hann sagði bara „Já, það er þessi píkusíða.“ Þetta er greinilega alveg í umræðunni hjá þessum börnum. Það þarf auðvitað ekki meira en eitt barn sem rambar inn á svona síðu og finnst það eitthvað fyndið og spennandi til að það spyrjist út,“ segir María.

Mikilvægt að setja upp netsíu og ræða við börn um netnotkun

María ræddi um síðuna við son sinn en segir það síður en svo hafa verið auðvelt. Hún segir að syni sínum hafi fundist það sem hann sá á síðunni mjög ógeðslegt og þau hafi reynt að nálgast málið út frá því að það sé margt mjög ógeðslegt á internetinu. Það væri því alls ekki allt þar sem maður ætti að skoða.

Hún hvetur foreldra til að setja upp netsíu í tölvum heimilisins því maður viti aldrei hvaða síðum krakkar lendi inni á á netinu. Það sé þó ekki alltaf nóg því til að mynda geti ýmislegt ógeðfellt poppað upp á síðum eins og YouTube. Því sé mikilvægt að foreldrar fylgist almennt vel með tölvunotkun barna sinna.

„Ég velti því fyrir mér í gær þegar ég fór að velta þessu fyrir mér að snúa mér til skólayfirvalda og fá þau til að gera eitthvað. Ég held hins vegar að við séum alltof gjörn á að snúa okkur til skólans og láta hann tækla þetta en auðvitað erum þetta við sem foreldrar sem eigum að taka ábyrgðina, þó að það sé auðvitað fínt að það sé líka umræða um þetta í skólanum.“