Starfseminni ekki viðhaldið verði uppsagnir ekki dregnar til baka

Fjórir af fimm læknum sem sérhæfðir eru í hjartaþræðingum á Landspítalanum sögðu störfum sínum lausum í lok síðasta árs. Vonir eru bundnar við að uppsagnirnar, sem að óbreyttu taka gildi í lok mars - byrjun apríl, verði dregnar til baka því ljóst er að ella verður starfseminni ekki viðhaldið.

„Starfsemin yrði í miklu lágmarki og sumu yrði alls ekki ekki hægt að sinna. Til að mynda væru það brennsluaðgerðir á leiðslukerfum hjartans, ákveðnar tegundir, við gáttatifi til dæmis. Það yrði ekki hægt að sinna því hér nema þá með að ráða inn mann frá útlöndum eða eitthvað slíkt. Taka þá einhverjar tarnir í því þannig. En það er ástand sem ég vil helst ekki hugsa til og vona að sé ástæðulaust að gera,“ segir Gestur Þorgeirsson, yfirlæknir á hjartadeild Landspítalans.

300 á biðlista – 3 mánaða bið að jafnaði

Tuttugu og tveir hjartalæknar starfa á Landspítalanum í þrettán stöðugildum en einungis fimm eru sérhæfðir í hjartaþræðingum og brennsluaðgerðum á hjarta. Rúmlega þrjú hundruð manns eru á biðlista eftir hjartaþræðingu og er biðtíminn að jafnaði þrír mánuðir. Gestur segir listann heldur lengri en vanalega, það sé bæði vegna verkfalls lækna ásamt því að bíða þurfti eftir nýju hjartaþræðingatæki í sumar.

Sjá einnig: Tíu prósent lifa biðina ekki af

Gestur er þó vongóður um að læknarnir muni draga uppsagnir sínar til baka. Þeir þurfi einungis tíma til að líta yfir nýjan kjarasamning og stöðu þeirra í dag. Þá segist hann bjartsýnn á framhaldið, en á þessu ári verða ráðnir inn tveir nýir læknar á hjartadeild Landspítalans. 

„Það er óljóst hvort þeir muni draga uppsagnirnar til baka en svona hófleg bjartsýni með það og svo eigum við von á tveimur nýjum,“ segir Gestur að lokum.