Dagpeningar námu um 4,6 milljónum

Hafnarfjarðarhöfn eyddi um níu milljónum í ferðalög starfsmanna hafnarinnar á árunum 2011 til 2014. Þar af var kostnaður við dagpeninga starfsmanna 4,6 milljónir króna. Til samanburðar eyddu allar aðrar stofnanir Hafnarfjarðarbæjar samanlagt 12,6 milljónum króna í dagpeninga fyrir starfsmenn sína.

Þetta kemur fram í úttekt sem Capacent gerði á Hafnarfjarðarhöfn fyrir bæinn.

Alls var farið í 32 ferðir á tímabilinu sem námu 108 ráðstefnudögum og 132 dögum þar sem dagpeningar voru greiddir út. Hafnarstjórinn, Már Sveinbjörnsson, fór í flestar þessara ferða eða 28 þeirra, ýmist einn eða með öðru starfsfólki hafnarinnar.

Már Sveinbjörnsson, hafnarstjóri Hafnarfjarðarhafnar, segir að höfnin sé markaðsdrifin höfn og heimsóknir á ráðstefnur og fundi séu partur af markaðsstefnu hafnarinnar.

„Árið 2006 og 2007 var skoðað hvernig mætti markaðssetja höfnina og þá var meðal annars skoðað að leggja áherslu á skemmtiferðaskip. Þetta var ákvörðun sem hafnarstjórnin tók á sínum tíma og við höfum fylgt því,“ segir Már.

Höfnin er aðili að Cruise Iceland og Cruise Europe sem eru samtök um móttöku skemmtiferðaskipa til Íslands. Á þeirra vegum hafa starfsmenn hafnarinnar sótt margar ráðstefnur.

Athygli vekur að árið 2014 fækkar ferðum umtalsvert en það ár var farið í fjórar ferðir og meðal annars var hætt við ferð til Miami til að skoða skemmtiferðaskip á vegum Cruise Iceland.

„Við fórum þarna tvisvar á ári til Miami eða til Evrópu á vegum Cruise Iceland. Eftir ráðstefnuna 2013 þá mátum við það svo að þessar ferðir væru ekki að skila okkur ákveðnum ábata þannig að það var hætt við að fara árið 2014.“

Í úttekt Capacent kemur fram að bæjarstjóri Hafnarfjarðar skrifi undir allar dagpeningaskýrslur.

„Allar greiðslur dagpeninga eru samkvæmt reglum ríkisins og hafa verið kvittaðar af bæjarstjóra,“ segir Már og bendir á að öll gögn um slíkt hafi verið opinber og ekkert sé falið í þeim efnum.

Haraldur L. Haraldsson, bæjarstjóri Hafnarfjarðar, vildi ekki tjá sig um efni úttektarinnar.