Þjálfari Charlton líkir Jóhanni Berg við Beckham

Guy Luzon, þjálfari Charlton Athletic er ánægður með íslenska landsliðsmanninn Jóhann Berg Guðmundsson sem var maðurinn á bak við öll þrjú mörk liðsins í 3-0 útisigri á Blackpool í ensku b-deildinni í gærkvöldi.

Jóhann Berg lagði upp fyrstu tvö mörk liðsins í leiknum en fyrst var fylgt eftir skoti hans og svo átti íslenski vængmaðurinn stoðsndingu. Jóhann Berg skoraði síðan sjálfur það þriðja með skoti beint úr aukaspyrnu.

„Hann er eins og David Beckham Championship-deildarinnar," sagði Guy Luzon um Jóhann Berg sem hefur nú skorað átta deildarmörk á leiktíðinni.

„Hann veit að hann getur skorað úr öllum aukaspyrnum og hann er alvöru vopn fyrir okkur," sagði Guy Luzon.

Jóhann Berg hefur skorað fjögur af þessum átta mörkum sínum í síðustu níu leikjum Charlton.

Jóhann Berg er nú næstmarkahæsti leikmaður liðsins á leiktíðinni á eftir framherjanum Igor Vetokele.