Höfða bótamál gegn íslenska ríkinu vegna tafa á rannsókn fjársvikamáls

Fjárhaldsmaður Guðjóns Árna Konráðssonar, þroskaskerts manns, hefur ákveðið að stefna íslenska ríkinu og Landsbanka Íslands vegna gríðarlegra tafa á rannsókn fjársvikamáls þar sem milljónir voru sviknar af manninum. Þetta staðfestir lögmaður mannsins.

„Við erum að tala um miklu miklu meiri upphæð en dómurinn dæmdi Guðjóni. Maðurinn hafði klárlega af honum yfir 10 milljónir. Málið endaði svona vegna dráttar hjá lögreglunni,“ segir Jóna Ósk Konráðsdóttir, systir Guðjóns Árna, sem hefur séð um málið fyrir hans hönd ásamt eiginmanni sínum.

Málið var kært til lögreglu í október 2007. Ákæra var hins vegar ekki gefin út fyrr en í júní árið 2013. Hæstiréttur dæmdi nýlega karlmann í níu mánaða skilorðsbundið fangelsi fyrir að hafa haft rúmlega tvær og hálfa milljón af Guðjóni. Þá fyrir að hafa blekkt starfsmenn Sparisjóðsins í Keflavík til að millifæra peninga af reikningi Guðjóns. Peningana notaði hann að mestu leyti í eigin þágu. Dómurinn ákvað að skilorðsbinda dóminn vegna þess hversu lengi málið dróst. „Í dómi Hæstaréttar segir að drátturinn sé vítaverður og í hróplegu ósamræmi við lög um meðferð sakamála, stjórnarskrána og mannréttindasáttmála Evrópu.“

Jónu þykir skelfilegt að kerfið skuli virka þannig að illa sé farið með fólk sem minna má sín. „Í þessu tölulega umhverfi er hann bróðir minn með þroska á við tíu ára barn. Ég hef barist í þessu máli í átta ár og ætla ekki að fara gefast upp núna,“ segir Jóna um skaðabótamálið sem höfðað verður á hendur íslenska ríkinu á næstunni.