Kísilverð hefur lækkað mikið það sem af er ári

Iðnaður Kísilverð hefur lækkað nokkuð mikið frá því í mars síðastliðnum. Í kynningarriti Stefnis hf. um fjárfestingarmöguleika í kísilveri Thorsil frá því í nóvember er birt verðspá sem sýnir mun hærra verð á kísli en þekkist í dag.

Í skýrslunni, sem Fréttablaðið hefur undir höndum og var dreift á fundi með lífeyrissjóðum, er sagt að verðið á kísli sé um 2.600 dollarar á tonnið til Evrópu. Er þetta gert eftir langtímaspá erlends fyrirtækis sem heitir CRU frá því í mars. Framkvæmdastjóri Stefnis segir skýrsluna hafa verið uppfærða með nýrri gögnum.

Stefnir hélt kynningu fyrir fjárfesta í nóvember síðastliðnum og virðist sem gamla verðspáin hafi verið lögð fyrir fjárfestana. Þar er verðið mun hærra en markaðsverð kísils í dag. Í skýrslu sama fyrirtækis, CRU, dagsettri 15. desember síðastliðinn, kemur fram að sex vikna meðalverð á kísli nái ekki 2.100 dollurum.

„Hlutverk Stefnis í Thorsil-verkefninu hefur verið að leggja mat á fjárfestinguna fyrir hönd okkar stærstu viðskiptavina, sem eru lífeyrissjóðir og tryggingafélög, og undirbúa verkefnið á þann hátt að það sé tækt til ákvörðunartöku hjá þessum aðilum,“ segir Flóki Halldórsson, framkvæmdastjóri Stefnis.

Flóki segir að leitað hafi verið til fyrirtækisins CRU til að fá frá þeim langtímaspá fyrir þær afurðir sem Thorsil muni selja.

„Við létum fyrst gera slíka spá í mars en létum uppfæra hana núna í október. Allar tölur í módeli hafa verið uppfærðar og líka grafið í kynningunni. Fjárfestar sem hafa fengið kynninguna með gömlu spánni hafa fengið senda nýja spá,“ segir Flóki.

Nú vinnur Thorsil að því að fá til sín nýja fjárfesta. Fjármögnunin verður í heildina 295 milljónir dollara. Núverandi hluthafar munu verða með um 15-25 milljónir dollara. Nýir hluthafar koma inn með 65 til 95 milljónir og það sem upp á vantar, um 200 milljónir dollara, verur fengið að láni.

Búið er að semja um afhendingaráætlun á 67 MW raforku frá Landsvirkjun og eru 23,5 MW háð byggingu Hvammsvirkjunar. Samningurinn er til átján ára. Einnig hefur samningur verið gerður við HS Orku um 32 MW og verður hægt að fá 12 MW til viðbótar frá HS Orku ef Hvammsvirkjun verður ekki að veruleika.

Búið er að gera sölusamninga um ríflega 80 prósent af ársframleiðslu Thorsil og því verður fyrirtækið ekki eins berskjaldað gagnvart tímabundnum lækkunum og áður.

„Samkvæmt CRU eru verð eins og þau eru í dag í línu við spána frá því í október og gera þeir ráð fyrir því í spá sinni að verð fari að hækka upp úr miðju næsta ári,“ segir Flóki.