Tom Hanks sakar lækna um að reyna að græða á krabbameini eiginkonu hans

Óskarsverðlaunahafinn Tom Hanks sakar ákveðna starfsmenn innan læknastéttarinnar um að reyna að græða á krabbameini eiginkonu hans.

Rita Wilson greindist með brjóstakrabbamein í desember síðastliðnum og hefur nú lokið læknismeðferð ásamt því að gangast undir tvöfalt brjóstnám.

Hanks var í viðtali við ástralska vefinn News.com.au þar sem hann kvartaði undan hrægömmum innan læknastéttarinnar sem höfðu samband við hjónin eftir að Wilson hafði verið greind með brjóstakrabbamein. Sagði hann suma þeirra hafa verið algjöra skottulækna sem hefði einungis verið að reyna að græða pening.

„Svona vitleysa viðgengst og mér finnst það undarlegt. Þetta eykur á erfiðleikana og við vorum heppin að hafa efni á góðri læknishjálp. Það eru þó til einstaklingar þarna úti sem eru að bjóða upp á og selja falskar vonir. Eina sem ég get sagt er guð blessi konuna mína og hugrekki hennar.“

Hann sagði Ritu hafa verið afar hugrakka þegar hún greindi heiminum frá því að hún væri með brjóstakrabbamein.

„Það eina sem þú getur gert þegar svona lagað kemur upp á er að hætta öllu sem þú ert að gera og beina allri athyglinni að vandanum. Þetta er heilbrigðis krísa sem við vitum öll að er hreint helvíti.“

Wilson, sem er hvað þekktust fyrir hlutverk  sín í kvikmyndunum Sleepless in Seattle og It´s Complicated, hvatt fólk til að fara í reglulega í krabbameinsskoðun. „Læknar telja að ég muni ná mér að fullu. Af hverju? Því krabbameinið mitt greindist snemma,“ sagði hún við tímaritið People.