Hálslón á yfirfall þvert á spár

Hálslón, miðlunarlón Kárahnjúkavirkjunar, er fullt og komið á yfirfall. Þetta er með nokkrum ólíkindum þar sem horfur á fyllingu miðlunarlóna Landsvirkjunar voru slæmar fyrri hluta septembermánaðar. Svo slæmar að Landsvirkjun tilkynnti stórnotendum sínum að takmarkanir á orkuafhendingu væru nær óumflýjanlegar strax 1. október.

Óvenju hlýtt veðurfar í septembermánuði orsakaði hins vegar aukna jökulbráðnun og þar með aukið innrennsli í miðlanir Landsvirkjunar. Þarf svo ekki að fara mörgum orðum um vætutíð síðustu vikna.

Staða annarra miðlunarlóna Landsvirkjunar hefur jafnframt batnað mjög á sama tíma. Nú vantar um 65 sentímetra á að Þórisvatn fyllist en í Blöndulón vantar enn um 1,5 metra á fyllingu þess og því nokkuð í að Blöndulón fari á yfirfall.