Stefán Jón Hafstein horfir til Bessastaða

Forsetakosningar eru á næsta ári og horfa nú ýmsir til Bessastaða þó enginn hafi enn lýst því yfir að hann ætli að bjóða sig fram. Enda erfitt um vik þegar sitjandi forseti neitar að setja um fyrirætlanir sínar, sitt hvað er að fara fram gegn sitjandi forseta eða bjóða sig fram ætli hann að fara frá. Ólafur Ragnar Grímsson forseti ætlar ekki að greina frá því hvað hann ætlar sér fyrr en um áramót.

Stefán Jón Hafstein, sem nú starfar hjá Þróunarsamvinnustofnun Íslands, er enn þeirra sem hefur verið nefndur sem kandídat í forsetaframboð, og hann virðist heitur, volgur í það minnsta, í samtali við Vísi.

„Ég hef fengið dálítið af ábendingum og hvatningu frá í sumar og ákvað að sinni að ákveða ekkert - af eða á. Það er mikilvægara að fá umræðuna um hlutverk forseta á gott skrið áður en kemur að slíkum ákvörðunum. Ég hef vissulega mínar hugmyndir og skilgreint erindi sem ég tel að gæti gagnast á þessum vettvangi, en hvort fólk hefur áhuga á því sama, eða mér persónulega til þeirra verka, er bara órætt mál að mestu,“ segir Stefán Jón.

Er að hugsa málið

Hann hefur opnað sérstaka síðu á Facebook, Hlutverk forseta, þar sem hann kallar eftir umræðum um embættið og hvað það sé sem þjóðin væntir frá forsetanum. Óhjákvæmilega vaknar þá sú spurning hvort Stefán Jón sjálfur stefni á framboð.

„Ég hugsa málið eins og margir hafa beðið mig um. En það er langt í kosningar og um nóg að tala varðandi forseta og hlutverk hans, þess vegna opna ég þennan vettvang,“ segir Stefán Jón.

Vettvangur til að ræða embættið

Stefán Jón segist hafa ákveðið að leggja gott til þó ekki væri meira og taka frumkvæði að því að hafa „umræðuna á okkar forsendum - okkar sem ráðum í raun ferð um forsetakjör. Svo er bara að sjá til hvers það leiðir, en nýir tímar bjóða upp á ný vinnubrögð og nýtt fólk.“

Stefán Jón telur upplagt að virkja möguleika samfélagsmiðlanna til umræðu og hann hefur sett fram spurningalista, einskonar könnun, til að fá fólk til að velta fyrir sér hlutverki forseta á næsta kjörtímabili áður en við persónugerum kjörið. „Hvað viljum við með embættið? Það er spennandi að nýta svona vettvang til lýðræðislegra tilrauna. Nú færum við umræðuna á annan reit en verið hefur að undanförnu, að mínu mati er kominn tími til að breyta... í þessu efni eins og svo mörgu,“ segir Stefán Jón.