Ólafur Ragnar ekki búinn að ákveða hvort hann bjóði sig fram aftur

„Ég er kannski ekki búinn að ákveða mig,“ sagði Ólafur Ragnar Grímsson aðspurður að því hvort hann væri búinn að ákveða sig hvort að hann byði sig fram á nýjan leik til embættis Forseta Íslands. Hann segist þó finna fyrir því að margir vilji að hann bjóði sig fram aftur.

Ólafur Ragnar var gestur Sigurjóns M. Egilssonar í þættinum Á Sprengisandi í morgun. Hlusta má á þann hluta viðtalsins þar sem Ólafur Ragnar ræðir framtíð sína í spilaranum hér að ofan.

Forsetakosningar fara fram á næsta ári og mikið hefur verið ritað og rætt um hvort að Ólafur Ragnar muni bjóða sig fram á nýjan leik. Ólafur Ragnar sagði að ákvörðunin yrði fyrst rædd innan fjölskyldunnar en hann finni þó fyrir góðum stuðningi á meðal þjóðarinnar.

„Við ræðum þetta, við Dorrit og fjölskyldan. Þetta er ekki bara spurning um mig, þetta er spurning um hana og dætur mína,“ sagði Ólafur Ragnar. „Allir þeir sem vilja að ég haldi áfram, sem eru greinilega margir og víða, ég fann það bara á landsleiknum í gær, þegar ég mæti í skóla og annarstaðar er alltaf að koma fólk að mér og segja að ég eigi að halda áfram, það sýnir mér að þetta er í hugum margra.“

Tilkynnir um áform sín í nýársávarpi sínu

Athygli vakti við þingsetningu þegar Ólafur Ragnar sagðist vera að setja Alþingi í síðasta sinn og túlkuðu margir það sem svo að hann væri þar með að tilkynna um að hann myndi ekki bjóða sig fram til forseta á nýjan leik. Ólafur Ragnar segir svo ekki hafa verið og að nýársávarpið sé hefðbundnari leið til þess að tilkynna um áform sín.

„Þegar ég setti Alþingi var ég að ræða við Alþingi, ekki þjóðina. Ég hef ekki umboð til þess að setja Alþingi á nýjan leik. Forsetaembættið hefur ákveðnar hefðir og nýársávarpið er fastur punktur í samskiptum þjóðar og forseta. Þjóðin er að velta þessu fyrir sér og ég er ekkert að trufla þá umræðu þó ég bíði með það þangað til í nýársávarpinu að tilkynna mína afstöðu.“

„Aldrei talið mig ómissandi“

Ólafur Ragnar sagði jafnframt að hann hefði ákveðið að bjóða sig fram á nýjan leik fyrir síðustu kosningar vegna þess að á þeim tímapunkti hefði þjóðin verið að glíma við mörg erfið verkefni á sama tíma og nefndi hann í því skyni setningu nýrrar stjórnarskrár, efnahagsmál, Icesave-deilurnar og mögulega aðild Íslands að Evrópusambandinu. Taldi hann að nú væru rólegri tímar í íslensku samfélagi.

„Ástæðan fyrir því að ég ákvað að verða við óskum um að bjóða mig fram á nýjan leik síðast var að þá var þjóðin að heyja margar örlagaglímur á mörgum sviðum. Þessum glímum er að mörgu leyti lokið. Ég hef aldrei talið mig ómissandi og ef ég tek þá ákvörðun um að hætta vona ég að því verði sýndur fullur skilningur.“

Ólafur Ragnar Grímsson var gestur Sigurjóns M. Egilssonar í þættinum á Sprengisandi í morgun.