„Tækfæri til að sýna gestum það besta sem bærinn hefur upp á að bjóða“

Ljósanótt í Reykjanesbæ var sett í dag við mikla athöfn en þetta er í sextánda skipti sem hátíðin er haldin. Það sem upphaflega var eins dags viðburður hefur nú orðið að fjögurra daga hátíð þar sem bæjarbúar bjóða upp á skemmtun af ýmsu tagi.

Aðspurð um hvaða þýðingu Ljósanótt hafi fyrir Reykjanesbæ segir Valgerður Guðmundsdóttir, menningarfulltrúi og  framkvæmdarstjóri Ljósanætur, að þetta sé fyrst og fremst tækifæri til að bjóða gestum í bæinn og sýna þeim allt það besta sem bærinn hefur upp á að bjóða.

Þetta er í tólfta skipti þar sem hátíðin er sett með því móti að öll grunnskólabörn, auk elstu barna leikskóla Reykjanesbæjar, hittast fyrir framan Myllubakkaskóla og sleppa helíumblöðrum í mismunandi litum. Er þetta gert í því skyni að fagna fjölbreytileikanum.

Þó hefur borið á gagnrýnisröddum vegna umhverfismengandi áhrifa þess að sleppa blöðrum út í náttúruna. Fjallað var um málið á Stöð 2 í vikunni. Aðspurður segist Kjartan Már Kjartansson, bæjarstjóri Reykjanesbæjar, ekki sjá fyrir sér aðra útfærslu á setningarhátíðinni en bætir jafnframt við að: „ Þetta þarf allt að endurskoða, velta fyrir okkur hvort við séum að gera rétt. En ef ég ætti að svara núna þá segi ég já, höldum þessu áfram.“