Lýsa furðu á afskiptaleysi FME og Samkeppniseftirlits

Þingflokksformaður Sjálfstæðisflokksins segir að yfirtaka bankanna á þremur sparisjóðum að undanförnu setji að henni hroll. Hún tekur undir gagnrýni þingmanns Samfylkingarinnar á afskiptaleysi Samkeppniseftirlitsins og Fjármálaeftirlitsins gagnvart þessum yfirtökum.

Á undanförnum vikum hafa viðskiptabankarnir tekið yfir þrjá stóra sparisjóði. Þingmenn bæði stjórnar og stjórnarandstöðu lýstu áhyggjum sínum vegna þess á Alþingi í dag.

Össur Skarphéðinsson þingmaður Samfylkingarinnar sagðist telja að allir stjórnmálaflokkar væru sameinaðir um þá ósk að hægt yrði að byggja aftur upp sparisjóðakerfið á grunni þeirra sjóða sem á annað borð hefðu lifað hrunið af. En á undanförnum nokkrum vikum hefðu viðskiptabankarnir þrír sporrennt þrjá stærstu sparisjóðina; Sparisjóð Vestmannaeyja, Afli og nú síðast Sparisjóði Norðurlands.

„Og það er með ólíkindum að sjá hvernig mynstrið er. Það sem einkennir þessa atburðarás er það að um leið og það koma fjárfestar ýmist með innlenda eða erlenda peninga og sjá viðskiptatækifæri í sparisjóðunum koma stóru bankarnir og gleypa þá. Og ég spyr hvar er Fjármálaeftirlitið, hvar er Samkeppniseftirlitið,“ sagði Össur.

Bankarnir fengju sparisjóðina ókeypis þar sem þeir gætu nýtt sér skattalegt tap sjóðanna og fengju viðskiptavini þeirra með í kaupbæti.

„En það sem mestu skiptir fyrir bankana og mestu skiptir líka fyrir okkur neytendur er að með þessu eru bankarnir að ryðja burt mögulegum keppinaut í framtíðinni,“ sagði Össur.

Ragnheiður Ríkharðsdóttir þingflokksformaður Sjálfstæðisflokksins tók undir orð Össurar um ásælni bankanna í sparisjóðina.

„Það fer ekki mikið fyrir áliti Samkeppniseftirlitsins þegar stóru bankarnir gleypa sparisjóðina. Það fer heldur ekki mikið fyrir Fjármálaeftirlitinu í því ferli,“ sagði Ragnheiður.

Með yfirtöku bankanna og samruna Straums og MP banka væri verið að rýra samkeppni á fjármálamarkaði. Þessi yfirtaka bankanna hljóti að kalla á að Fjarmálaeftirlitið fari ofan í saumana á þessari yfritöku og af hverju ekki var gengið til viðræðna við innlenda fjárfesta sem vildu kaupa Afl.

„Það hlýtur virðulegur forseti að klingja einhverjum bjöllum hér í þessum sal fyrir okkur sem hér sátum í það minnsta árið 2007 þegar að bankakerfið hrundi eða 2008. Það virðist sem við stefnum í jafn einsleitt bankakerfi og áður var. Virðulegur forseti, með fullri virðingu, það setur að mér hroll,“ segir Ragnheiður Ríkharðsdóttir.