Hlaupið gegn sjálfsvígum ungra karla

Rauði krossinn og Geðhjálp bjóða almenningi að taka þátt í opinni hlaupaæfingu tólf manna hlaupahóps undir merkjum Útmeð´a á laugardaginn. Hlaupaæfingin er liður í undirbúningi hlauparanna undir hringhlaup í kringum landið um næstu mánaðamót. Markmið hópsins er að vekja athygli á því að sjálfsvíg eru algengasta dánarorsök ungra íslenskra karlmanna og safna áheitum til að efna til vitundarvakningar um vandann.

Hlaupið verður frá aðalskrifstofu Rauða kross Íslands, Efstaleiti 9, kl. 11 á laugardaginn. Boðið verður upp á tvær vegalengdir á opnu æfingunni, 3 km og 5 km, og er þátttakan öllum opin og ókeypis. Öllum hlaupurum verður upp á létta hressingu að loknu hlaupi.

Í tilkynningu frá Rauða krossinum kemur fram að Geðhjálp, Hjálparsími Rauða krossins og hlaupahópurinn standa sameiginlega að átaks- og forvarnarverkefnisins Útmeð‘a. Með því slagorði eru ungir menn hvattir til að setja tilfinningar sínar í orð í því skyni að hafna ekki í tilfinningalegu öngstræti.

„Markmið átaksins er að efna til vitundarvakningar meðal almennings til að fækka sjálfsvígum í þessum viðkvæma hópi.“

Einnig kemur fram að fjórir til sex ungir menn taki líf sitt að jafnaði á hverju ári hér á landi. Á degi hverjum snýst rúmlega eitt símtal til Hjálparsíma Rauða krossins 1717 um sjálfsvíg, eigið eða annarra. Símtöl til hjálparsímans um sjálfsvíg voru 42% fleiri fyrrihluta ársins 2015 en fyrrihluta ársins 2014.

Hægt er að styrkja hlaupið um 1.500 kr. með því að hringja í símanúmerið 904 1500 eða eða leggja inn á söfnunarreikning Geðhjálpar, 546 – 14 – 411114, kt. 531180 – 0469 valda upphæð. Einnig er hægt að styrkja verkefnið með frjálsum framlögum á hlaupaæfingunni.

Stefnt er að því að vitundarvakningu gegn sjálfsvígum ungra karla verði ýtt úr vör með frumsýningu forvarnarmyndbands á Alþjóðlegum forvarnardegi gegn sjálfsvígum þann 10. september næstkomandi.