Segja óljóst hvort fundurinn hafi staðist sveitarstjórnarlög

Minnihluti Samfylkingar og Vinstri grænna í Hafnarfirði fordæma það sem hann kallar „þau ólýðræðislegu vinnubrögð sem fulltrúar Bjartrar framtíðar og Sjálfstæðisflokks hafa viðhaft í kringum undirbúning og boðun fundarins,“ í tilkynningu nú í hádeginu.

Vísar minnihlutinn þar til aukafundar í bæjarstjórn Hafnarfjarðar sem fram fór í morgun þar sem ræddar voru breytingar á stjórnskipulagi bæjarins.   Formlegt fundarboð var sent út síðastliðið föstudagskvöld en bæjarstjórnin fór í tveggja vikna sumarfrí síðastliðinn miðvikudag.

„Óljóst er hvort boðunin stenst ákvæði sveitarstjórnarlaga en hingað til hafa þau ekki verið túlkuð með þeim hætti sem meirihlutinn í Hafnarfirði hefur nú gert og um leið takmarkað möguleika kjörinna fulltrúa til að sinna lögbundnu hlutverki sínu,“ segir minnihlutinn og bætir við að hann muni fara fram á að innanríkisráðuneytið úrskurði um lögmæti fundarins.

„Teljum við að tillögur að grundvallarbreytingum á stjórnkerfi bæjarins eigi að fá eðlilega og lýðræðislega málsmeðferð áður en bæjarstjórn tekur um þær endanlega ákvörðun. Tillögur meirihlutans hafa hins vegar enga umfjöllun fengið í nefndarkerfi sveitarfélagins og engan opinbera kynningu hlotið. Við lögðum því til að þeim yrði vísað til eðlilegrar og lýðræðislegrar málsmeðferðar í bæjarráði og forsetanefnd, sem samkvæmt samþykkt sveitarfélagsins hefur það verkefni með höndum að undirbúa og leggja fram tillögur um stjórnkerfisbreytingar. Þeirri tillögu hafnaði meirihluti Bjartrar framtíðar og Sjálfstæðisflokks.“