Talið að ástin hafi verið kveikjan að bensínsprengjuárás við Skautahöllina

Yfirheyrslur yfir fimm drengjum á aldrinum sextán til átján ára standa nú yfir en þeir eru sakaðir um að hafa ráðist á þrjá jafnaldra sína við Skautahöllina í Laugardal í gær.

Voru þeir vopnaðir bensínsprengju og bareflum að því er fram kom í skýrslu frá lögreglu í gær. Var einhvers konar brúsa eða flösku kastað í áttina að drengjunum.

Varðstjóri hjá lögreglunni á höfuðborgarsvæðinu upplýsti í samtali við Vísi að yfirheyrslur stæðu yfir. Reikna mætti með því að þær tækju ekki langan tíma og í kjölfarið yrðu þeir ákærðir.

Sem betur fer slasaðist enginn í árásinni í gær en talið er að ósætti drengjanna hafi eitthvað með ástarmál að gera.