Ragnheiður Elín á ráðstefnu Alþjóðajarðhitasambandsins í Ástralíu

Ragnheiður Elín Árnadóttir iðnaðar- og viðskiptaráðherra situr nú heimsráðstefnu Alþjóðajarðhitasambandsins sem haldin er í Melbourne í Ástralíu. Um hundrað Íslendingar sitja ráðstefnuna ásamt Ragnheiði Elínu.

Í frétt atvinnuvega- og nýsköpunarráðuneytisins segir að ráðstefnan sé haldin á fimm ára fresti og sé aðalmarkaðstorg jarðhitarannsókna og jarðhitaþjónustu í heiminum. Ísland verður gestgjafaland ráðstefnunnar árið 2020.  

„Áhugi á nýtingu jarðhita verður stöðugt meiri víða um lönd enda er nú aðeins örlítill hluti virkjanlegs jarðhita nýttur og tækifærin því mörg. Á ráðstefnunni koma saman helstu sérfræðingar heims um jarðhita og á ráðstefnunni er allt til umræðu sem lýtur að nýtingu jarðhita svo sem vísindi, tækni og fjármögnun.

Íslensk fyrirtæki eru áberandi á ráðstefnunni og þá er gaman að geta þess að margir fyrrum nemendur Jarðhitaskóla Sameinuðu þjóðanna á Íslandi eru í lykilhlutverkum fyrir sín lönd. Ráðstefnunni lýkur föstudaginn 24. apríl og þá mun Ragnheiður Elín flytja ávarp,“ segir í fréttinni.