Stefnt að því að tvöfalda fjölda blindrahunda á Íslandi

Ágóðinn af sölu Rauðu fjaðrarinnar, barmmerki Lions, mun í ár renna í sjóð til að fjármagna kaup á leiðsöguhundum fyrir blinda og sjónskerta. Bergvin Oddsson, formaður Blindrafélagsins segir þörf á að fjölga slíkum hundum töluvert hér á landi.

„Í dag eru leiðsöguhundarnir sjö talsins,“ segir Bergvin.  „Um hundraðasti hver er með blindrahund á Norðurlöndunum, það eru 1500 manns á skrá á Íslandi. Þannig að það ættu að vera svona fimmtán hundar hér. Það er viðmiðið.“

Þeir sjö sem eru fyrir eru tiltölulega nýkomnir til landsins. Það er ekki talið standa undir kostnaði að rækta og þjálfa leiðsöguhunda hérlendis og þeir því keyptir frá Noregi og Svíþjóð. Blindrafélagið keypti tvo í fyrra og fimm árið 2007.

„Líftími hundanna er svona sjö til tíu ár,“ bendir Bergvin á. „Þannig að einn þeirra sem keyptur var um hrun er að hætta núna vegna heilsubrests. Þá þarf líka að endurnýja hundana fyrir þá notendur sem eru þegar með hund, þetta er svona eilífðarverkefni.“

Félagið horfir til þess að geta keypt fimm til átta hunda fyrir söfnunarféð frá Lions en hver hundur kostar um fjóra og hálfa milljón króna. Þegar hundarnir eru komnir til landsins eru þeir svo gefnir Þjónustu- og þekkingarmiðstöð fyrir blinda, sjónskerta og daufblinda einstaklinga. Þar eru þeir þjálfaðir og paraðir saman við notendur, en að því ferli loknu er kostnaðurinn við hvern hund nær tíu milljónum.

„Þegar nýr hundur kemur, þá hefst umsóknarferli,“ segir Bergvin. „Svo eru hundarnir svo mismunandi. Sumir þurfa mikla hreyfingu, sumir þurfa minni hreyfingu. Þannig að þarf svolítið að velja hund og mann. Menn eru metnir og það tekur svolítinn tíma.“

Ef söfnunin gengur vel, verða hundarnir sennilega keyptir í sumarlok eða með haustinu. Bergvin bendir þó á að takmarkað magn leiðsöguhunda er til í Svíþjóð og Noregi og Íslendingar ekki alltaf í forgangi. Þannig þurfi félagið líka að berjast við aðra áhugasama um hundana sem í boði eru.

Fulltrúar Lionshreyfingarinnar munu standa fyrir sölu á fjölförnum stöðum um helgina. Eygló Harðardóttir velferðarráðherra kaupir fyrstu Rauðu fjöðrina í Kringlunni klukkan tólf á föstudaginn.