Námsmatsstofnun braut lög með spurningalista fyrir grunnskólabörn

Persónuvernd kemst að þeirri niðurstöðu að Námsmatsstofnun hafi brotið lög með því að leggja spurningalista fyrir börn í 4., 7. og 10. bekk samhliða samræmdum prófum. Er stofnuninni gert að eyða þeim upplýsingum sem safnað var með spurningalistanum. Þetta kemur fram í úrskurði Persónuverndar.

Í október í fyrra barst Persónuvernd kvörtun frá foreldri vegna spurningalista sem lagður var fyrir nemendur í bekk dóttur hennar. Á listanum hafi komið fram að kynna eigi foreldrum listann og þeir þurfi að veita samþykki sitt. Einnig veki upp spurningar að listann eigi að merkja með nafni og kennitölu barnsins.

Vildu meðal annars fá upplýsingar um einelti

Í svari Námsmatsstofnunar við fyrirspurn Persónuverndar segir að listinn hafi átt að gegna þríþættu hlutverki. Fylgjast með mati nemenda á samræmdu prófunum, fylgjast með algengi eineltis og líðan nemenda en þriðja hlutverkið er óljósara; þar hafi átt að skjóta inn spurningum um ólík atriði hafi verið pláss til þess.

Varðandi auðkenningu með nafni og kennitölu taldi stofnunin nauðsynlegt að geta tengt svör nemenda við árangur á prófinu. Það eigi einkum við um spurningar er lúti að prófinu sjálfu, efni þess og hvernig nemendur undirbjuggu sig. Sömuleiðis hafi kennitalan átt að gefa upplýsingar um einelti yfir tíma og tengja námsárangur við hugmyndir nemenda um framtíðarstarf og búsetu.

Námsmatsstofnun viðurkenndi að bréf til foreldra hefðu ekki borist fyrir mistök. Auk þess hafi þeim ekki verið pakkað inn á réttan hátt. Vísað er til skipulagsvanda þar sem hlutverk starfsmanna hafi riðlast vegna fyrirhugaðs samruna Námsmatsstofnunar við Menntamálastofnun.

Þurfa að eyða svörunum

Foreldrið sem kvartaði kaus ekki að gera athugasemdir við svör stofnunarinnar. Í ljós hafði komið að spurningalistinn sem dóttir hennar svaraði hafði ekki verið sendur til Námsmatsstofnunar eftir að kvartað var og ljóst að samþykkis hefði ekki verið aflað. Þá staðfesti starfsmaður stofnunarinnar að stofnunin hefði engin samþykki frá foreldrum undir höndum. Skólum hefði ekki verið skylt að afhenda slíkar samþykkisyfirlýsingar. Ætlaðist stofnunin til að hver og einn skóli sæi um að afla upplýsts samþykkis.

Komst Persónuvernd að þeirri niðurstöðu að þar sem persónuupplýsingar voru skráðar án tilskilinnar heimildar þyrfti stofnunin að eyða svörum við spurningalistanum fyrir 1. maí næstkomandi.