Hús rýmd á Patreksfirði vegna snjóflóðahættu

Óvissustigi vegna snjóflóðahættu hefur verið lýst yfir á sunnanverðum Vestfjörðum og er búið að rýma 13 hús á Patreksfirði vegna snjóflóðahættu.

„Það er að ganga yfir landið mjög kröpp lægð með sterkri suðaustanátt og snjókomu sunnan- og vestanlands. Þessi úrkoma byrjaði um hádegisbil á Patreksfirði. Við erum búin að rýma þar reit 4 vegna snjóflóðahættu,“ segir Auður Kjartansdóttir er sérfræðingur á snjóflóðavakt Veðurstofu Íslands.

Hún segir að vel sé fylgst með snjóflóðahættu en eins og staðan er núna á hún ekki von á að rýma þurfi fleiri hús á Vestfjörðum.