Nær fjórfalt fleiri tjón af völdum holuaksturs

Sjóvá hafa borist 122 skýrslur um tjón af völdum holuaksturs það sem af er ári en á sama tíma í fyrra höfðu borist 35 skýrslur. Ástandið á götum höfuðborgarsvæðisins versnar dag frá degi og um helgina samþykkti landsþing Félags íslenskra bifreiðaeigenda (FÍB) ályktun um áskorun til stjórnvalda vegna málsins.

„XXX. landsþing FÍB skorar á ríkisstjórn og sveitarfélög að tryggja Vegagerðinni og öðrum veghöldurum þá fjármuni og önnur verkfæri sem þarf til að hindra frekara niðurbrot vega og gatna,“ segir í ályktuninni.

„Á höfuðborgarsvæðinu, þar sem umferð er mest á landinu, og á helstu þjóðleiðum utan þess hafa djúp hjólför fengið að myndast í yfirborð vega og gatna og lítið verið gert til úrbóta. FÍB hefur ítrekað varað við þessu ástandi sem er bæði varasamt og háskalegt.“