Hyggst gera stórmynd um skipskaða Suðurlandsins

Sigurjón Sighvatsson kvikmyndaframleiðandi hefur keypt kvikmyndaréttinn af bókinni Útkall í Atlantshafi á jólanótt. Þar er greint frá hinum hrikalegu örlögum flutningaskipsins Suðurland og áhöfn þess þar sem sex menn fórust. Stöð 2 hitti Sigurjón og Óttar Sveinsson, höfund bókarinnar, á Grandanum við Reykjavíkurhöfn, einmitt við þann stað sem útkallið barst um árið. Þar var björgunaraðgerðum stjórnað frá húsi Landsbjargar. 

Hrikaleg barátta í sjónum

Myndin mun byggja á bók Óttars sem út kom árið 1999. Fimm skipbrotsmenn af Suðurlandi lýsa þar hrikalegri baráttu í gúmmíbát í meira en hálfan sólarhring eftir að skip þeirra sökk á milli Íslands og Noregs á jólanótt árið 1986. Mennirnir börðust í stormi og myrkri við úthafsöldurnar. Ellefu voru í áhöfn, átta náðu í björgunarbátinn þar sem þrír höfðu það síðan ekki af. Margt bendir til að skipið hafi verið tekið niður af sovéskum eða jafnvel breskum kafbáti. 

Of ótrúleg saga 

Sigurjón segir þetta svo sterka og áhrifamikla sögu að allir geti sett sig í spor mannanna sem lentu í slysinu.

„Á ögurstund er líklega hverri persónu lýst best,“ segir Sigurjón. „Svo eru ýmsar aðrar ástæður sem gera þetta að spennandi kvikmyndaefni. Þetta er náttúrulega myndrænt og svo gerist þetta á jólanótt. Ef maður byggi þessa sögu til myndu allir segja að þetta væri afar fín mynd en þetta gæti aldrei hafa gerst.“

Sjá einnig: Trúnaðarskjöl Breta gætu opinberast 2016

Margt gerist á fjórtán tímum 

Óttar segist hafa séð atburðinn fyrir sér á hvíta tjaldinu.

„Já, maður gat alveg séð þetta fyrir sér. Þegar svo langur tími líður frá því slysið á sér stað, eitthvað um miðnætti, og þar til björgunin á sér stað. Þetta eru fjórtán klukkustundir og á þeim tíma gerist svo margt. Þarna eru menn að berjast fyrir lífi sínu og týna tölunni og margt að gerast annars staðar líka,“ sagði Óttar. Björgunarskipið var danskt og kom frá Færeyjum þar sem það var statt og með ógnarhraða var lagt af stað í björgun á aðfangadagskvöld.  

Verður að vera stórmynd 

Mikið verk er þó óunnið áður kvikmynd verður tilbúin en Óttar og Sigurjón hafa undirbúið gerð myndarinnar í tvö og hálft ár. Fimm ár gætu liðið þar til kvikmyndað verður.

„Það tekur náttúrlega langan tíma að koma myndum á hvíta tjaldið, ekki síst stórmyndum,“ segir Sigurjón. „Þetta er flókin mynd í framleiðslu og getur ekki orðið annað en stórmynd og dýr mynd. En mesta töfin er að bíða eftir því að handritið verði nógu gott svo þú farir í tökur.“ Óttar mun vinna að handritinu einnig, enda þekkir hann söguna best segir Sigurjón og því best að nota hans krafta.  

Sjá einnig: Vilja vita hvað raunverulega gekk á

Annt um minningu fólksins 

Ekki er í raun svo langt síðan Suðurlandið fórst og mun því kvikmynd um skipskaðann höfða sterkt til margra eftirlifandi ættingja og áhafnarmanna sem enn lifa. „Manni er annt um að halda minningu þessa fólks á lofti,“ segir Óttar.

Íslenska kvikmyndafyrirtækið Elf films gerði þessu skil í heimildarkvikmynd sem sýnd var síðustu jól á Stöð tvö og nefnist „Höggið.“ Sjá má brot úr myndinni í frétt Stöðvar tvö í spilaranum hér fyrir ofan.