Vilja fá að vita hvað raunverulega gekk á

„Það skiptir okkur öll miklu máli að sannleikurinn komi loks í ljós, bæði fyrir þá sem komust lífs af og einnig aðstandendur þeirra sem komu að slysinu á einn eða annan hátt, sem hafa ekki enn fengið að vita hvað nákvæmlega gerðist,“ segir Stefán Karl Stefánsson, en faðir hans, Stefán Björgvinsson, vann að lestun Suðurlands áður en skipið lagði í hinstu ferð sína, á aðfangadag jóla árið 1986.

Fréttablaðið greindi frá því síðastliðinn miðvikudag að líklega gætu gögn breska flotans varpað ljósi á hvað átti sér stað þegar Suðurlandið fórst djúpt norður í Atlantshafi. Vitað er af ferðum breskra kafbáta á svæðinu.

Sjá einnig: Trúnaðarskjöl Breta gætu opinberast 2016



Orsakir slyssins og þess að Suðurlandið fórst þessa nótt eru um margt óljósar. Skýrsla sjóslysanefndar gefur til kynna að frágangi á farmi skipsins hafi verið ábótavant og við það að skipið fékk á sig brotsjó hafi farmurinn brotnað og valdið þessu slysi. Aðrir vilja meina að breskir og rússneskir kafbátar hafi verið á svæðinu og valdið slysinu. Engar upplýsingar hafa fengist frá breska hernum sem varpa ljósi á hvað raunverulega gerðist.

„Bresk yfirvöld hafa ekki opnað bækur sínar um kafbátaferðir á þessum slóðun og hvorki hefur heyrst hósti né stuna frá rússneskum yfirvöldum varðandi þetta mál, allan þennan tíma,“ segir Óttar Sveinsson, blaðamaður, sem hefur rannsakað sjóslysið í langan tíma.

 „Man vel eftir því þegar hann brotnaði saman á stofugólfinu heima“

Stefán Karl telur þó ólíklegt að Bretar opni bækur sínar að fullu til þess að málið upplýsist. 

„Ég vil ekki búa til einhverjar vonir um að gögn fáist frá breska flotanum. Við vitum hins vegar að kafbátur breska flotans var þarna undir Suðurlandinu umrætt kvöld. Ef við fáum úr því skorið að Bretar hafi verið þarna og ekkert aðhafst til að bjarga sjómönnum úr ísköldu Atlantshafinu er það nægilegt tilefni til alvarlegrar milliríkjadeilu,“ segir Stefán Karl. 

Hann segir að skipsskaði Suðurlandsins hafi alla tíð verið föður sínum ofarlega í huga.

„Við ræddum þetta mál síðast aðeins örfáum dögum áður en hann lést árið 2012. Þetta tók mjög á hann og ég man mætavel eftir jólunum 1986 þegar hann brotnaði saman á stofugólfinu heima.“

„Skiptir máli fyrir þá sem komu að hleðslu skipsins að hið rétta komi í ljós“

Sigurður Hlöðversson missti föður sinn, Hlöðver Einarsson, þegar skipið sökk. Hlöðver var 41 árs gamall  Hann segir það vera mikilvægt að geta lokað málinu með því að fá úr því skorið í eitt skipti fyrir öll hvers vegna skipið fórst.

„Fyrir mig persónulega skiptir það að sjálfsögðu máli hvað þarna gerðist en ég hef ekki verið að velta mér mikið upp úr því hvað gerðist, á öllum þessum árum, hvort pabbi minn dó í vonskuveðri, hvernig skipið var hlaðið eða vegna hernaðarbrölts undir skipinu. Það færir mér hann ekki til baka en ég vil fá endalok í málið,“ segir Sigurður. 

Sigurður bendir einnig á að óvissan sé ónotaleg. „Þetta mál hefur dúkkað upp reglulega í gegnum árin í fjölmiðlum og það getur verið tilfinningalega óþægilegt að vera sífellt að lesa um það.

Hins vegar tel ég það skipta mjög miklu máli fyrir alla og ekki síst þá sem komust lífs af og þá sem unnu að hleðslu skipsins að hið rétta komi í ljós.“