Utangarðsmenn koma aldrei saman aftur

Hljómsveitin Utangarðsmenn mun ekki koma saman aftur í sinni upprunalegu mynd. Þetta sagði Bubbi Morthens í Kastljósi í gærkvöld. Utangarðsmenn hljóta að teljast einhver merkilegasta hljómsveit íslensku rokksögunnar og ljóst að margir munu eiga erfitt með að bíta í það súra epli að loku sé fyrir þetta skotið.

Bubbi kom víða við þegar hann ræddi við einlægan aðdáanda Utangarðsmanna, Helga Seljan; sagði söguna af tilurð hins tregafulla óðs síns, Blindsker heima hjá þáverandi félaga sínum Franklín Steiner heitnum, sem einhvern tíma var sagður umfangsmikill fíkniefnasali. Spurningunni um hvort ekki hafi komið til greina að flytja plötu Utangarðsmanna Geislavirkir með upprunalegu hljómsveitinni, svaraði Bubbi á þá leið að sú sveit muni ekki koma saman aftur. Fuglinn sá er sem sagt floginn.

Nú er sagt að hljómsveitir hætti aldrei en svo virðist vera ef marka má Magnús Stefánsson trymbil Utangarðsmanna. „Ég held að það sé alveg borin von. Því miður. Ég væri til í að spila þessa tónlist og láta á það reyna. Því hún er mikil áskorun, það þarf svo mikla orku og energí til að keyra þetta áfram. Og ég er í mínu besta formi en, félagsskapurinn er ekki uppbyggilegur,“ segir Magnús.

Utangarðsmenn komu saman á ný í kringum 060606 tónleikana, sem eins og nafnið gefur til kynna, voru sumarið 2006. Þeir tónleikar tókust afbragðs vel -- á yfirborðinu. „Það endaði ekki vel og þá tók ég þá ákvörðun að vera ekkert að umgangast vissa einstaklinga. Maður er orðinn edrú, búinn að fara í gegnum ákveðið þroskaferli og það passar ekkert endilega alltaf öllum að vera saman. Þó þetta hljómsveitardæmi hafi komið vel út tónlistarlega þá var þetta erfitt tilfinningalega og þetta er ekkert endilega félagsskapurinn sem maður passaði inní,“ segir Magnús. En, þeir sem fylgjast með í tónlistinni vita að oft hafa samskipti Magnúsar og Bubba verið erfið, svo ekki sé fastar að orði kveðið.