Dómur sem snýst um 400 milljarða fellur

Í dag verður stundvíslega klukkan 15:35 kveðinn upp dómur í héraðsdómi Reykjavíkur í máli sem Hagsmunasamtök heimilanna (HH) hafa rekið undanfarin ár gegn því sem Vilhjálmur Bjarnason, sem titlar sig ekki fjárfesti, segir „gegn ólöglega kynntri og útfærðri verðtryggingu allra húsnæðislána heimilanna. Um er að ræða mál sem HH reka og fjármagna, sem kynnt er á málaskrá sem mál Theodórs Magnússonar og Helgu Margrétar Guðmundsdóttur gegn Íbúðalánasjóði.

„Ég er búinn að bíða eftir þessu í fimm ár,“ segir Vilhjálmur sem er formaður HH, spurður hvort hann sé spenntur. „Það var hlegið að mér þegar ég sagði að gengislánin væru ólögleg á sínum tíma. Sagt að ég væri hálfviti. Við vitum hvernig dómurinn fór. Þó enn eigi eftir að dæma varðandi gengislánin, að upprunalegu vextirnir haldi sér á þeim.“

Vilhjálmur reyndar furðar sig á því hversu lítinn áhuga fjölmiðlar hafa sýnt þessu, að hans mati. „Já, mér finnst það merkilegra en nærbuxur Beyoncé að það sé að koma dómur í dag sem gæti þýtt það að verðtryggð lán heimilanna lækki um 400 milljarða. Alla veganna það. Sem tekið yrði á afslættinum sem bankarnir fengu á lánasöfnunum,“ segir Vilhjálmur. Og hann er sigurviss. „Ef dæmt verður eftir lögum er ég hundrað prósent viss um hvernig fer.“

Að upprunalegu vextirnir haldi sér? En, eru ekki breytilegir vextir tíundaðir í lánasamningi þeim sem þú sjálfur skrifaðir undir?

„Ég er alveg sáttur með vextina. Árna Páls-lögin settu lægstu óverðtryggðu vexti Seðlabanka Íslands á gengislánin til þess að þeir sem eru með verðtryggð lán færu ekki að rífa kjaft. En, ég hef haldið áfram að vera vitlaus,“ segir Vilhjálmur sem að sjálfsögðu ætlar að mæta þegar dómsuppsaga verður. „Já, ég hangi á snerlinum á eftir. Verð þar þegar opnar.“

Vilhjálmur velkist hvergi í vafa um að þetta sé stærsta mál Íslandssögunnar „og mun leiðrétta alla verðtryggingu aftur til 11 janúar 2001 ef dæmt verður eftir lögum landsins sem við hljótum að gera kröfu um.“