Sjö nemendum vikið úr Verzlunarskólanum fyrir prófsvindl

„Þeim var vísað úr skólanum,“ segir Ingi Ólafsson, skólastjóri Verzlunarskóla Íslands, um nemendurna sem voru staðnir að svindli í jólaprófum skólans sem lauk 14. desember síðastliðinn.

Um var að ræða sjö nemendur sem komust yfir lykilorð og komust þannig inn í tölvukerfi skólans en málið komst upp þegar kennarar voru að fara yfir próf í desember síðastliðnum.

Vísir hafði greint frá því að nemendunum yrði refsað en refsingin gæti verið allt frá því að próf séu ógild yfir í það að vísa nemendunum úr skóla.

Nemendurnir höfðu andmælarétt og fengu að koma sínum sjónarmiðum á framfæri en úr varð að þeim var vikið úr skóla.

„Þeir brjóta reglur, ekki bara reglur skólans, heldur almennar reglur með því að fara ólöglega inn á svæði kennara og sækja þar gögn,“ segir Ingi en ekki er vitað nákvæmlega hvernig nemendurnir komust yfir lykilorð kennara.

„Nei, við vitum það ekki nákvæmlega. Eigum við ekki að orða það þannig að það eru grunsemdir um ýmislegt en í sjálfu sér erum við ekkert að reyna að fara í einhverja mikla rannsókn á því hvernig þeir komust yfir þessi lykilorð. Við reynum bara að tryggja að þetta geti ekki gerst aftur og reynum að fyrirbyggja það,“ segir Ingi.

Nemendurnir sjö hafa nú allir hafið nám í öðrum framhaldsskólum að sögn Inga.