„Manni finnst þetta vera viðloðandi MORFÍs“

„Maður veltir fyrir sér framhaldinu og hefur áhyggjur af þessu. Manni finnst þetta vera viðloðandi MORFÍs en engar aðrar keppnir sem skólinn tekur þátt í,“ segir Már Vilhjálmsson, skólameistari Menntaskólans við Sund. Ræðulið skólans keppir í úrslitum ræðukeppninnar MORFÍs gegn liði Flensborgarskólans í kvöld.

Snemma í morgun stöðvaði lögreglan fjóra 17 ára pilta sem höfðu mokað miklu magni af hrossaskít við aðaldyr Flensborgarskólans. Lögreglan stöðvaði piltana er þeir voru að aka frá skólanum. Þeir sögðu þetta hafa átt að vera hrekk, en lögreglan lét þá moka öllum skítnum , sem reyndist vera hrossaskítur, upp í kerruna aftur og hreinsa vel til eftir sig.

Már telur líklegt að þetta séu nemendur hans úr Menntaskólanum við Sund. Fyrir fjórum árum síðan sagði Vísir frá því að nemendur MS hefðu sett mikið magn af skít við aðaldyr Verzlunarskóla Íslands, áður en lið skólanna mættust í úrslitum MORFÍs.

Már fór þá sjálfur á vettvang og hreinsaði til eftir nemendur sína.

„Í ljósi sögunnar bendir ansi margt til þess að þeir sem voru að verki séu nemendur frá okkur,“ segir Már um gjörninginn við Flensborg í nótt

Vill gjarnan stöðva þetta

Már segist hafa fundað með formanni Beljunnar, nemendafélagi MS, um málið. „Nýlega var kjörinn nýr formaður og ég fundaði með þeim báðum og félagsmálafulltrúanum. Við fórum yfir hvernig þetta mál væri vaxið.



Már segist þreyttur á því að svona mál komi upp ítrekað í sambandi við MORFÍs. Hann segir ljóst að eitthvað þurfi að gerast. 

„Annaðhvort finna menn einhverjar leiðir til að stöðva svona lagað og menn læra að haga sér eða að skólarnir þurfi að velta fyrir sér hvort þetta sé þáttur í félagslífinu sem þeir vilja standa að.“

Þannig að þið eruð jafnvel að skoða að draga liðið úr keppni?

„Þó svo að mér þyki allt í lagi að tala við blaðamenn, og það er ekkert að því, þá er þetta gjarnan eitthvað sem maður vill losna við. Að þurfa að svara fyrir eitthvað sem einhverjir ættu að skammst sín fyrir. Maður vill gjarnan stöðva svoleiðis,“ svarar Már.

Hefði farið og mokað sjálfur

Skemmst er að minnast þess þegar MS mætti Verzló í úrslitum Morfís vorið 2010. Þá var skít dreift við inngang Verzlunarskólans. Fór svo að Már mætti sjálfur og mokaði skítinn af tröppum Verzló.

„Ef strákarnir hefðu ekki verið látnir moka skítinn sjálfir hefði ég mætt á vettvang. Mér finnst að Flensborgarskólinn eigi ekki að bera neitt tjón af þessu. Ef þeir þurfa að bera einhvern kostnað af þessu á reikningurinn að sjálfsögðu að koma til okkar,“ segir Már.

Már segir ræðulið MS skipað góðu fólki sem lendi í því að aðgerðir annarra nemenda skemmi fyrir þeim.

„Það er hægt að heimfæra þetta yfir á fótboltann. Þar má finna fótboltabullur sem skemma fyrir. Félög eru sektuð og fá jafnvel heimaleikjabann ef stuðningsmenn þeirra ganga of langt. Almennt séð þykir mér ekkert óréttlátt að svona endurtekin ósæmileg hegðun hafi áhrif inn í félagslífið,“ segir skólameistarinn.