Staðnir að svindli í jólaprófum: „Verður afgreitt fljótlega“

„Þetta mál er bara í ferli núna og engin lokaákvörðun tekin enn,“ segir Ingi Ólafsson, skólastjóri Verzlunarskóla Íslands, í samtali við Vísi um örlög nemenda við skólann sem voru staðnir að svindli í jólaprófum í desember síðastliðnum.

Ingi sagði enga niðurstöðu vera komna í málið að svo stöddu en fyrir liggur að nemendurnir eiga yfir höfði sér refsingu og getur hún verið allt  frá því að próf séu ógild og yfir í að þeim verði vísað úr skóla.

„Ég vil ekkert vera að tjá mig um málefni þessara ungmenna. Þetta mál er bara í sínu ferli og verður afgreitt fljótlega,“ segir Ingi.

Nemendurnir eru sagðir hafa komist yfir lykilorð að tölvukerfi skólans en málið komst upp við yfirferð kennara á jólaprófunum.  Ingi segist ekki vilja tjá sig þegar hann er spurður hvernig nemendurnir komust yfir lykilorðin. Hann segir nemendurna hafa andmælarétt og þeir nú þegar komið sínum sjónarmiðum á framfæri.