Málverkastuldur í Reykjavík: „Verkið er mér ómetanlegt“

Málverki var stolið frá myndlistakonunni Sigrúnu Sigurðardóttur í nóvember síðastliðnum. Verkið hafði verið til sýnis á listasýningu sem Sigrún hélt í húsnæði Domus Medica við Egilsgötu í Reykjavík en þangað virðist hafa ratað inn þjófur sem í kjölfarið tók verkið ófrjálsri hendi.

Verkið er Sigrúnu ómetanlegt en hún hafði eytt rúmu ári í að mála það. Um er að ræða stærðarinnar málverk af Bessastöðum. „Mér finnst nánast eins og ég hafi misst barnið mitt. Ég lagði allt mitt í þetta málverk og þykir afskaplega vænt um það. Ég hef varla getað notið jólanna ég sakna þess svo og þykir þetta svo sárt,“ segir Sigrún.

Hún tilkynnti málið til lögreglu og fékk að líta á myndir úr öryggismyndavélum. „Myndavélarnar sýna að um leið og hann kom inn tók hann upp myndavél og tók mynd af verðlistanum sem hékk uppi á vegg. Þannig að þetta var alveg skipulagt hjá honum. Hann vafraði síðan um í smá stund og beið eftir að enginn væri á ferð og tók málverkið,“ segir Sigrún en myndin var til sölu á 380 þúsund krónur, hennar allra dýrasta listaverk.

Þetta er ekki í fyrsta sinn sem Sigrún verður fyrir slíku óláni en á sama stað fyrir þremur árum var öðru málverki frá henni stolið. Blessunarlega fannst það verk aftur.

„Það er hræðilegt ef listamenn geta ekki haldið sýningar án þess að hlutunum verði rænt,“ segir hún. „Verkið er mér ómetanlegt og ég óska mér þess svo heitt að fá það aftur í hendurnar.“

Sigrún segir að maðurinn sem sást hnupla verkinu sé á sextugsaldri, meðalmaður á hæð með grásprengt skegg, heldur bústinn. Á myndunum var hann með hvíta derhúfu.

Hún biðlar til allra þeirra sem telja sig hafa vitneskju um málið að hafa samband við lögregluna á höfuðborgarsvæðinu í síma 444-1000.

Innlegg frá Lögreglan á höfuðborgarsvæðinu.

Hér er maðurinn sem um ræðir.